លោកឧត្តមសេនីយ៍ Mojtaba Fada មេបញ្ជាការកងឆ្មាំបដិវត្តន៍ឥស្លាមអ៊ីរ៉ង់ (IRGC) ដែលឈរជើងក្នុងខេត្ត Isfahan បាននិយាយថា ទីក្រុងតេអេរ៉ង់ មិនចូលរួមក្នុងការប្រឈមមុខដាក់គ្នាជាមួយអ៊ីស្រាអែលទេ ប៉ុន្តែធ្វើសង្រ្គាមផ្ទាល់ប្រឆាំងនឹងសហរដ្ឋអាមេរិក។  

ទីភ្នាក់ងារសារព័ត៌មាន Tasnim បានដកស្រង់សម្តីលោកថា៖«ថ្ងៃនេះ យើងប្រឆាំងនឹងសហរដ្ឋអាមេរិកខ្លួនឯង។ យើងមិនទទួលស្គាល់អ្វីដែលគេហៅថា អ៊ីស្រាអែលទេ ហើយយើងកំពុងចូលរួមក្នុងការប៉ះទង្គិចគ្នាខាងយោធាដោយផ្ទាល់ ជាមួយជនជាតិអាមេរិក»។

យោងតាមលោកឧត្តមសេនីយ៍ បានឲ្យដឹងថា អ៊ីស្រាអែល និងអាមេរិ កព្យាយាមបង្កសង្គ្រាមស៊ីវិល នៅក្នុងប្រទេសលីបង់។ ឧត្តមសេនីយ៍នៃកងឆ្មាំបដិវត្តន៍ឥស្លាមអ៊ីរ៉ង់ (IRGC) បានបន្ថែមថា៖«អាមេរិក កំពុងប្រើប្រាស់ជម្រើស និងធនធានទាំងអស់ ដើម្បីគាំទ្ររបបបង្ហូរឈាមនេះ ខណៈពេលដែលក្រុមជ្វីហ្វនិមកំពុងប្រយុទ្ធក្នុងនាមជនជាតិអាមេរិក»។

កាលពីថ្ងៃទី ០១ ខែតុលា ឆ្នាំ ២០២៤នេះ អ៊ីរ៉ង់ បានបើកការវាយប្រហារមីស៊ីលបាលីស្ទិក និងមីស៊ីលល្បឿនលឿនជាងសំឡេងប្រឆាំងនឹងអ៊ីស្រាអែល ជាការឆ្លើយតបទៅនឹងការសម្លាប់មន្ត្រីជាន់ខ្ពស់មកពីចលនាប៉ាឡេស្ទីនហាម៉ាស់ ចលនាហេសបូឡា Shia ដែលមានមូលដ្ឋាននៅប្រទេសលីបង់ និងកងឆ្មាំបដិវត្តន៍ឥស្លាមអ៊ីរ៉ង់ (IRGC)។ ទីក្រុងតេអេរ៉ង់ បាននិយាយថា ៩០ភាគរយនៃមីស៊ីលទាំងនោះ បានវាយប្រហារចំគោលដៅដែលបានកំណត់របស់ពួកគេ។ ផ្ទុយទៅវិញ អ៊ីស្រាអែល បានអះអាងថា អ៊ីរ៉ង់បានបាញ់មីស៊ីលប្រហែល ១៨០គ្រាប់ ចូលទៅក្នុងប្រទេសនេះ ដែលភាគច្រើនត្រូវស្ទាក់ចាប់បាន។ អគ្គសេនាធិការកងទ័ពអ៊ីស្រាអែល បានប្តេជ្ញាជ្រើសរើសពេលវេលាដ៏ត្រឹមត្រូវ ដើម្បីធ្វើឲ្យអ៊ីរ៉ង់ភ្ញាក់ផ្អើល ជាមួយនឹងការវាយបក ខណៈមេដឹកនាំកំពូលអ៊ីរ៉ង់ Ayatollah Ali Khamenei បានព្រមានថា អ៊ីស្រាអែល នឹងឃើញការវាយប្រហារទ្រង់ទ្រាយធំជាងនេះទៅទៀត។