រូបភាពវីដេអូឃ្លីបពីប្រទេសម៉ារ៉ុក ឃើញដើមដូង និងវាលខ្សាច់ជន់លិចនៅទូទាំងសមុទ្រខ្សាច់សាហារ៉ាកាលពីថ្ងៃព្រហស្បតិ៍ ក្រោយភ្លៀងធ្លាក់ដ៏កម្រ បានវាយប្រហារតំបន់មួយនេះ ។

រូបភាពវីដេអូឃ្លីបថតបានដោយយានដ្រូននៅភូមិ Merzouga ជិតទីក្រុង Rachidia ស្ថិតនៅតំបន់ភាគអាគ្នេយ៍ប្រទេសម៉ារ៉ុក ឃើញទំហំនៃការជន់លិចបង្កឡើងដោយសារភ្លៀងធ្លាក់ខ្លាំង ។

នៅក្នុងសារបង្ហោះលើបណ្តាញព័ត៌មានសង្គម អគ្គនាយកដ្ឋានឧតុនិយមម៉ារ៉ុក និយាយថា ប្រទេសមួយនេះ បានជួបប្រទះសំណើមមិនប្រក្រតីកាលពីខែកញ្ញា ដែលនាំឲ្យកើតមានភ្លៀងធ្លាក់ខ្លាំងបែបនេះនៅក្នុងខែតុលា ។

ពួកគេបន្តថា តំបន់មួយចំនួន មានភ្លៀងធ្លាក់ខ្លាំងកម្ពស់រហូតដល់ ២០០មីលីម៉ែត្រ ក្នុងរយៈពេល ៤៨ម៉ោង ជាហេតុនាំឲ្យកើតមានទឹកជំនន់ដ៏គំហក់បែបនេះ ។

យោងតាមរបាយការណ៍ពីការិយាល័យទទួលបន្ទុកការសម្របសម្រួលកិច្ចការមនុស្សធម៌របស់អង្គការសហប្រជាជាតិ(OCHA) បានឲ្យដឹងថា ភ្លៀងធ្លាក់ខ្លាំង បានសម្លាប់មនុស្សជាង ១.៤៦០នាក់ នៅ បណ្តាលប្រទេសជាច្រើន ស្ថិតនៅតាមគែមសមុទ្រខ្សាច់សាហារ៉ា ។

ស្របពេលដែលស្ថានភាពអាកាសធាតុអាក្រក់បែបនេះ កម្រមាននោះ វាកាន់តែកើតឡើងញឹកញាប់ជាងមុន ដោយសារឥទ្ធិពលនៃបម្រែបម្រួលអាកាសធាតុ ៕