ប្រធានាធិបតីរុស្ស៊ី លោក Vladimir Putin បាននិយាយថា សមភាគីទួរគីរបស់លោក គឺលោក Tayyip Erdogan បានស្នើឲ្យមានដំណើរការឡើងវិញនូវទំនាក់ទំនង ជុំវិញការដឹកជញ្ជូន នៅសមុទ្រខ្មៅ ប៉ុន្តែថាលោកមិនទាន់មានពេលដើម្បីសិក្សាពីឯកសារនេះនៅឡើយទេ។

គួរបញ្ជាក់ថា ទាំងប្រទេសទួរគី និងអគ្គលេខាធិការអង្គការសហប្រជាជាតិ (UN) លោក Antonio Guterres បានប្រឹងប្រែងជាយូរមកហើយ ដើម្បីធ្វើយ៉ាងណាឲ្យទទួលបាននូវកិច្ចព្រមព្រៀងដឹកជញ្ជូនទំនិញ ដោយសេរីបន្ថែមទៀត កាត់តាមសមុទ្រខ្មៅ ដែលផ្នែកខ្លះបានក្លាយទៅជាតំបន់សង្គ្រាមកងទ័ពជើងទឹក ចាប់តាំងពីរុស្ស៊ីបានលុកលុយអ៊ុយក្រែន ក្នុងខែកុម្ភៈ ឆ្នាំ២០២២។

លោក Putin បានប្រាប់ទូរទស្សន៍រដ្ឋរុស្ស៊ីថា លោក Erdogan ជាថ្មីម្ដងទៀត «បានចាប់ផ្ដើមលើកឡើងវិញនូវសំណើទាំងនេះ ដើម្បីបន្តកិច្ចព្រមព្រៀង ទងនឹងការដឹកជញ្ជូន នៅសមុទ្រខ្មៅ (និង) លើបញ្ហាមួយចំនួនផ្សេងទៀត»។ លោក Putin បានជួបចាមួយលោក Erdogan និងលោក Guterres នៅឯកិច្ចប្រជុំកំពូល BRICS ក្នុងទីក្រុង Kazan របស់រុស្ស៊ី។

លោក Putin បានប្រាប់ឲ្យដឹងថា៖ «ខ្ញុំមិនទាន់មានពេលវេលា ដើម្បីអានឯកសារនោះទេ។ «មែនហើយ រង់ចាំមើលទាំងអស់គ្នា។ យើងមិនដែលបដិសេធរឿងនេះទេ»។

សូមបញ្ជាក់បន្ថែមថា ទួរគី និង UN បានជួយសម្របសម្រួលគំនិតផ្តួចផ្តើមគ្រាប់ធញ្ញជាតិសមុទ្រខ្មៅ ដែលជាកិច្ចព្រមព្រៀងមួយបានកើតឡើង នៅក្នុងខែកក្កដា ឆ្នាំ២០២២ ដែលអាចឲ្យមានការនាំចេញគ្រាប់ធញ្ញជាតិអ៊ុយក្រែនជិត ៣៣លានតោនដោយសុវត្ថិភាពឆ្លងកាត់សមុទ្រខ្មៅ ទោះបីជាសង្រ្គាមកំពុងបន្តមានក៏ដោយ។ រុស្ស៊ីបានដកខ្លួនចេញពីកិច្ចព្រមព្រៀងនេះ ក្រោយរយៈពេលមួយឆ្នាំ ដោយរិះគន់ថា ការនាំចេញអាហារ និងជីរបស់ខ្លួនជួបនឹងឧបសគ្គធ្ងន់ធ្ងរ៕