ប្រធានាធិបតីប៉ូឡូញ លោក Andrzej Duda បាននិយាយនៅថ្ងៃសុក្រថា កិច្ចព្រមព្រៀងដែលអនុញ្ញាតឲ្យរថក្រោះ K2 របស់កូរ៉េខាងត្បូងផលិតនៅក្នុងប្រទេសប៉ូឡូញ អាចត្រូវបានចុះហត្ថលេខាក្នុងប៉ុន្មានសប្តាហ៍ខាងមុខនេះ ដែលនេះជាការជំរុញដ៏មានសក្តានុពល ចំពោះផែនការរបស់ទីក្រុងវ៉ាសូវី ក្នុងការកសាងប្រព័ន្ធការពារជាតិរបស់ខ្លួន។

ប៉ូឡូញបាននិងកំពុងបង្កើនការចំណាយផ្នែកយោធា ដើម្បីជាការឆ្លើយតបទៅនឹងការលុកលុយរបស់រុស្ស៊ីទៅលើប្រទេសជិតខាងអ៊ុយក្រែន ហើយកូរ៉េខាងត្បូងបានលេចឡើងជាប្រទេសផ្គត់ផ្គង់អាវុធដ៏សំខាន់មួយ។

ក្រុមហ៊ុន Hyundai Rotem របស់កូរ៉េខាងត្បូង ដែលមានជំនាញក្នុងកិច្ចសន្យាឧស្សាហកម្ម និងការពារជាតិ បានឈានដល់កិច្ចព្រមព្រៀង ក្នុងឆ្នាំ២០២២ ដើម្បីចែកចាយរថក្រោះ K2 ចំនួន ១.០០០គ្រឿង ប៉ុន្តែរហូតមកដល់ពេលនេះ បានចុះកិច្ចសន្យាក្នុងរង្វង់ទឹកប្រាក់ត្រឹមតែ ៤,៥សែនកោដិវ៉ុន (៣,៤ពាន់លានដុល្លារ) ប៉ុណ្ណោះ ដើម្បីនាំចេញរថក្រោះ ១៨០គ្រឿង។ 

ប៉ូឡូញសង្ឃឹមថា នឹងពន្លឿនការដាក់ពង្រាយដោយទទួលបានរថក្រោះដែលផលិតនៅក្នុងទឹកដីរបស់ខ្លួនឯង។ ការប្រកាសនេះបានកើតមានឡើង ២ថ្ងៃ បន្ទាប់ពីសហរដ្ឋអាមេរិក បាននិយាយថា ខ្លួនបានរកឃើញភស្តុតាងដែលថា កូរ៉េខាងជើងបានបញ្ជូនទាហានចំនួន ៣.០០០នាក់ទៅកាន់ប្រទេសរុស្ស៊ី ដែលអាចដាក់ពង្រាយ នៅក្នុងអ៊ុយក្រែន។

កាលពីថ្ងៃព្រហស្បតិ៍ (ទី២៤ ខែតុលា) មេដឹកនាំប៉ូឡូញ និងកូរ៉េខាងត្បូង បានព្រមព្រៀងគ្នាជំរុញការបញ្ចប់កិច្ចសន្យាថ្មីមួយ ដើម្បីនាំចេញរថក្រោះ K2 របស់កូរ៉េខាងត្បូងទៅប៉ូឡូញ នៅចុងឆ្នាំនេះ៕