នៅព្រឹកថ្ងៃទី២៦តុលានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយឯកឧត្តម Wang Wenbin ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជាបានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ នូវសមិទ្ធផលនានា ក្រោមគម្រោងជំនួយរបស់សាធារណ រដ្ឋប្រជាមានិតចិន សម្រាប់ការកែលម្អបរិស្ថានសាលារៀន និងផ្គត់ផ្គង់សម្ភារៈបរិក្ខារអប់រំនៅកម្ពុជា”ដែលពិធីត្រូវបានប្រារព្ធនៅវិទ្យាល័យ ហ៊ុន សែន ពាមជីកង ស្រុកកងមាស ខេត្តកំពង់ចាម។
ជាមួយនឹងការអរគុណដល់រដ្ឋាភិបាលនិងប្រជាជនចិនដែលមានទឹកចិត្ត ហើយតែងតែគាំទ្រនិងផ្តល់កិច្ចសហប្រតិបត្តិការនិងយកចិត្តទុកដាក់ជួយដល់កម្ពុជា ជាពិសេសជំនួយឥតសំណងលើវិស័យអប់រំ នៅខេត្តកណ្តាល រាជធានីភ្នំពេញ និងខេត្តកំពង់ចាមនេះ ដែលមានទឹកប្រាក់ជាង ២២លានដុល្លារ ក្នុងនោះថវិកាបដិភាគរបស់រាជរដ្ឋាភិបាលកម្ពុជាជាង២លានដុល្លារអាមេរិក សម្តេចធិបតីបានមានប្រសាន៍ថា៖ សមិទ្ធផលទាំងនេះ នឹងចូលរួមចំណែកយ៉ាងសំខាន់ សម្រាប់ពង្រឹងគុណភាព អភិវឌ្ឍន៍ធនធានមនុស្សនៅកម្ពុជានិងពង្រឹងមិត្តភាពជាប្រពៃណី រវាងប្រជាជន និងប្រជាជន នៃប្រទេសទាំងពីរ។
សូមបញ្ជាក់ថា គម្រោងជំនួយរបស់សាធារណរដ្ឋប្រជាមានិតចិន សម្រាប់កែលម្អ បរិស្ថានសាលារៀន និងការផ្គត់ផ្គង់សម្ភារបរិក្ខារអប់រំនៅកម្ពុជា ជាជំនួយឥតសំណងរបស់សាធារណរដ្ឋប្រជាមានិតចិន មានថវិកាសរុបជាង២២លាន ដុល្លារអាមេរិក ក្នុងនោះថវិកាជាង ២០លានដុល្លារអាមេរិក គាំទ្រដោយរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជាជាង២លានដុល្លារអាមេរិកដែលមានរយៈពេលអនុវត្តគម្រោងចាប់ពីឆ្នាំ២០១៨ ដល់ឆ្នាំ២០២២។ គម្រោងនេះបានសាងសង់អគារសិក្សា អគារធនធាន ផ្ទះសំណាក់គ្រូ បង្គន់អនាម័យ អណ្តូងទឹក តារាងបាល់ទាត់ តារាងបាល់បោះ របង ផ្លូវ និងប្រឡាយទឹក (ប្រព័ន្ធរំដោះទឹក) នៅវិទ្យាល័យចំនួន២៦ និងមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល ស្ថិតនៅរាជធានីភ្នំពេញ ខេត្តកណ្តាល និងខេត្តកំពង់ចាម៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
