នាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃសៅរ៍ ទី២៦ ខែតុលានេះ បានតាមដាន ការវាយប្រហារលើប្រទេសអ៊ីរ៉ង់ពីបន្ទប់ប្រតិបត្តិការ នៅក្រសួងការពារជាតិអ៊ីស្រាអែល ក្នុងទីក្រុង Tel Aviv រួមជាមួយរដ្ឋមន្ត្រីការពារជាតិអ៊ីស្រាអែល លោក យ៉ូអាវ ហ្គាលែន(Yoav Gallant) និងមេបញ្ជាការយោធាអ៊ីស្រាអែល លោក Herzi Halevi ។

អ៊ីស្រាអែល បានវាយបកសងសឹកទៅលើប្រទេសអ៊ីរ៉ង់ នៅព្រឹកថ្ងៃសៅរ៍នេះ ដោយយោធារបស់ខ្លួនបាននិយាយថា កំពុងធ្វើការវាយលុកប្រឆាំងគោលដៅយោធា ជាការឆ្លើយតបទៅនឹងការវាយប្រហាររបស់ក្រុងតេអេរ៉ង់ លើប្រទេសអ៊ីស្រាអែល។

ប្រព័ន្ធផ្សព្វផ្សាយសាធារណៈរបស់អ៊ីស្រាអែល បានរាយការណ៍ថា យន្តហោះចម្បាំងរាប់សិបគ្រឿងកំពុងវាយប្រហារលើគោលដៅយោធា។ ប្រព័ន្ធផ្សព្វផ្សាយ NBC News និង ABC News បានរាយការណ៍ដោយដកស្រង់សម្តីមន្ត្រីអ៊ីស្រាអែលម្នាក់ថា គោលដៅមិនរាប់បញ្ចូលហេដ្ឋារចនាសម្ព័ន្ធថាមពល ឬទីតាំងនុយក្លេអ៊ែរនោះទេ។

ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍ថា ការផ្ទុះដ៏ខ្លាំងត្រូវបានគេឮនៅជុំវិញទីក្រុងតេអេរ៉ង់ និងទីក្រុង Karaj ដែលនៅជិតខាង ប៉ុន្តែបាននិយាយសម្រាលពីការវាយប្រហារនៅក្នុងរបាយការណ៍ដំបូង ដោយនិយាយថា ជីវិតរស់នៅនៅតែបន្តដូចធម្មតា។