ទូកក្ដោង៖ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានប្រកាសបង្កើតគណៈកម្មការដើម្បីរៀបចំការប្រកួតកីឡាទូកក្ដោងជ្រើសរើសជើងឯកអាស៊ីអាគ្នេយ៍ឆ្នាំ២០២១ នៅខេត្តព្រះសីហនុនាខែធ្នូខាងមុខ ដោយមានឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC គឺជាប្រធានគណៈកម្មកា។
ឯកឧត្តម វ៉ាត់ ចំរើន អគ្គលេខាធិការ CAMSOC និងជាអនុប្រធានអចិន្ត្រៃយ៍ នៃគណៈកម្មការដើម្បីរៀបចំការប្រកួតកីឡាទូកក្ដោងជ្រើសរើសជើងឯកអាស៊ាននេះបានមានប្រសាសន៍ថា គោលដៅចម្បងនៃការទទួលធ្វើម្ចាស់ផ្ទះកីឡាទូកក្តោងចុងឆ្នាំនេះ គឺដើម្បីឆ្ពោះទៅទទួលធ្វើម្ចាស់ផ្ទះស៊ីហ្គេមឆ្នាំ២០២៣ ហើយក៏ជាកិត្តិយសរបស់កម្ពុជាក្នុងឋានៈជាម្ចាស់ផ្ទះ នៃព្រឹត្តិការណ៍អន្តរជាតិនេះផងដែរ។ ឯកឧត្តមបន្ដថា តាមគោលការណ៍សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC បានដាក់គោលដៅនៃការរៀបចំប្រកួតកីឡាទូកក្ដោងអន្តរជាតិនៅអាស៊ីអាគ្នេយ៍នេះជាចលនា ឬក៏ជាព្រឹត្តិការណ៍មួយដើម្បីបំផុសដំណើរការឆ្ពោះទៅស៊ីហ្គេមឆ្នាំ២០២៣។ ការណ៍នេះគណៈកម្មការរៀបចំត្រូវមានភាពច្បាស់លាស់ក្នុងការតួនាទី ភារៈកិច្ចនៃគណៈកម្មការជំនាញនីមួយៗ។ ចំពោះសមាជិកគណៈកម្មការខាងលើមាន ១១រូបក្រៅពីឯកឧត្តមបណ្ឌិត ថោង ខុន និងឯកឧត្តម វ៉ាត់ ចំរើន គឺមានឯកឧត្តម ឈន សុភាព, ឯកឧត្តម ថោង រដ្ឋសក្ដិ និងឯកឧត្តម ម៉ាង ស៊ីណេត ជាអនុប្រធាន រួមទាំងសមាជិក ៦រូបគឺមានឯកឧត្តម អ៊ុក សិទ្ធិជាតិ, ឯកឧត្តម គៀត ច័ន្ទថារិទ្ធ, ឯកឧត្តម ហ៊ឹម យ៉ាន, ឯកឧត្តម អ៊ុក សីហា និងលោក សោម សុទ្ធរិទ្ធិពង្ស។
សូមបញ្ជាក់ថា កាលពីថ្មីៗគណៈកម្មាធិការជាតិ CAMSOC បានស្នើសុំរាជរដ្ឋាភិបាល ក្រោយបានទទួលការអនុញ្ញាតជាគោលការណ៍ដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដើម្បីឲ្យភាគីពាក់ព័ន្ធសហការគ្នារៀបចំព្រឹត្តិការណ៍អន្ដរជាតិថ្នាក់តំបន់នេះ ពិសេសកិច្ចសហការរវាងសហព័ន្ធកីឡាទូកក្ដោងកម្ពុជា និងសហព័ន្ធកីឡាទូកក្ដោងសង្ហបុរី។ តាមការគ្រោងទុកព្រឹត្តិការណ៍នេះនឹងរៀបចំការប្រកួតចំនួន ១២វិញ្ញាសាដោយកម្ពុជា និងសិង្ហបុរីនឹងចែកគ្នារៀបចំការប្រកួត ៦វិញ្ញាសាម្នាក់។ ជាមួយការធ្វើម្ចាស់ផ្ទះការប្រកួតកីឡាទូកក្ដោងលក្ខណៈអន្ដរជាតិលើកដំបូងនេះ កម្ពុជារំពឹងថានឹងទទួលបានអត្ថប្រយោជន៍ជាច្រើនដល់គុណផល និងបច្ចេកទេសកីឡា ដើម្បីត្រៀមស៊ីហ្គេមឆ្នាំ២០២៣ នៅកម្ពុជាផង និងអត្ថប្រយោជន៍ជាកិត្តិយស កិត្យានុភាពជាតិក្នុងនាមជាម្ចាស់ផ្ទះផង។ ពិសេសក៏បង្ហាញពីការចាប់ផ្ដើមស្ដារសេដ្ឋកិច្ចសង្គម និងទេសចរណ៍ក្នុង និងក្រោយស្ថានភាពវិបត្តិកូវីដ-១៩ ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
