ក្រសួងការបរទេសរបស់ប្រទេសកូរ៉េខាងជើង បាននិយាយនៅថ្ងៃសៅរ៍ ទី២៦ ខែតុលានេះ ថា ក្រសួង​បានថ្កោលទោសយ៉ាងខ្លាំងចំពោះសកម្មភាពយោធារបស់សហរដ្ឋអាមេរិកនាពេលថ្មីៗនេះ ជាមួយ​សម្ព័ន្ធមិត្តរបស់ខ្លួន នៅក្នុងតំបន់ នេះបើយោងតាមសេចក្តីថ្លែងការណ៍មួយដែលធ្វើឡើងដោយប្រព័ន្ធផ្សព្វផ្សាយរដ្ឋ KCNA។

ក្រសួងបាននិយាយ «យើងថ្កោលទោសយ៉ាងដាច់អហង្ការ ចំពោះសកម្មភាពអរិភាពរបស់សហរដ្ឋអាមេរិក ដែលប្រើប្រាស់សកម្មភាពយោធាដោយឥតប្រុងប្រយ័ត្នជាមួយសម្ព័ន្ធមិត្តរបស់ខ្លួន ដោយមិនពេញចិត្តនឹងភាពតានតឹងផ្នែកនយោបាយ និងយោធាបច្ចុប្បន្ននៅលើឧបទ្វីបកូរ៉េ ដែលបង្ហាញពីការបង្កគ្រោះថ្នាក់នៃការផ្ទុះឡើងមិនច្បាស់លាស់ ជាការគំរាមកំហែង និងជាការញុះញង់ធ្ងន់ធ្ងរ ដល់សន្តិសុខក្នុងតំបន់។

ក្រសួងបានលើកឡើងពីការចូលរួមរបស់ប្រទេសអូស្ត្រាលី នាពេលថ្មីៗនេះ នៅក្នុងសមយុទ្ធដែនអាកាសរវាងសហរដ្ឋអាមេរិក និងកូរ៉េខាងត្បូង ជាសមយុទ្ធរួមគ្នារវាងសហរដ្ឋអាមេរិក និងជប៉ុន និងការបញ្ជូននាវាផ្ទុកនុយក្លេអ៊ែររបស់សហរដ្ឋអាមេរិក។

យោងតាមកងកម្លាំងកូរ៉េខាងត្បូងបានឲ្យដឹងថា កងទ័ពអាកាសអាមេរិក និងកូរ៉េខាងត្បូង បានធ្វើសមយុទ្ធយោធារួមគ្នា «ទង់សេរីភាព» ពីថ្ងៃចន្ទ ទី ២១ ខែតុលា រហូតដល់ថ្ងៃសុក្រ ទី ១ ខែវិច្ឆិកា ហើយយន្តហោះដឹកជញ្ជូនពហុមុខងារ KC-30A របស់កងទ័ពអាកាសអូស្ត្រាលី ក៏បានចូលរួមផងដែរ។