សហរដ្ឋអាមេរិក នៅថ្ងៃសៅរ៍ (ទី២៦ ខែតុលា) នេះ បានជំរុញឲ្យប្រទេសអ៊ីរ៉ង់បញ្ឈប់ការវាយប្រហារលើអ៊ីស្រាអែល ដើម្បីការពារកុំឲ្យមានអំពើហិង្សាដដែលៗកើតឡើង បន្ទាប់ពីអ៊ីស្រាអែលបានបើកការវាយប្រហារប្រឆាំងនឹងសាធារណរដ្ឋអ៊ិស្លាម ដែលជាការសងសឹកចំពោះការបាញ់មីស៊ីលយ៉ាងសន្ធាប់លើខ្លួន នៅដើមខែនេះ។

អ្នកនាំពាក្យក្រុមប្រឹក្សាសន្តិសុខជាតិអាមេរិក លោក Sean Savett បានប្រាប់អ្នកសារព័ត៌មានថា៖ «យើងជំរុញឲ្យអ៊ីរ៉ង់បញ្ឈប់ការវាយប្រហាររបស់ខ្លួនលើអ៊ីស្រាអែល ដើម្បីឲ្យវដ្តនៃការប្រយុទ្ធគ្នានេះអាចបញ្ចប់ទៅបាន ដោយគ្មានការកើនឡើងនូវភាពតានតឹងបន្ថែមទៀត»។

គួរបញ្ជាក់ថា យោធាអ៊ីស្រាអែលបានធ្វើការវាយប្រហារតាមអាកាសប្រឆាំងនឹងប្រទេសអ៊ីរ៉ង់ នៅថ្ងៃសៅរ៍ (ទី២៦ ខែតុលា) នេះ ដោយវាយប្រហារទៅលើមូលដ្ឋានយោធា និងទីតាំងមីស៊ីល និងប្រព័ន្ធផ្សេងៗទៀត នៅក្នុងតំបន់ជាច្រើន។

លោក Savett បានបន្ថែមថា៖ «ការឆ្លើយតបរបស់ពួកគេ គឺអនុវត្តន៍ការការពារខ្លួន និងជាពិសេស ការវាយប្រហារនេះ បានជៀសវាងតំបន់ដែលមានប្រជាជនរស់នៅ ដោយផ្តោតតែលើគោលដៅយោធា ផ្ទុយពីការវាយប្រហាររបស់អ៊ីរ៉ង់លើអ៊ីស្រាអែល ដែលបានកំណត់គោលដៅលើទីក្រុងមានប្រជាជនច្រើនបំផុតរបស់អ៊ីស្រាអែល»។

ដោយសង្កត់ធ្ងន់ថា សហរដ្ឋអាមេរិកមិនបានចូលរួមក្នុងប្រតិបត្តិការនេះទេ លោកបានបញ្ជាក់ថា៖ «នេះគឺជាគោលបំណងរបស់យើង ក្នុងការពន្លឿនគោលនយោបាយការទូត និងកាត់បន្ថយភាពតានតឹង នៅក្នុងតំបន់មជ្ឈិមបូព៌ា»៕