ប្រជាជនហ្សកហ្ស៊ី នៅថ្ងៃសៅរ៍ (ទី២៦ ខែតុលា) នេះ បានចាប់ផ្ដើមទម្លាក់សន្លឹកឆ្នោតរបស់ខ្លួនទៅក្នុងធុង នៅក្នុងការបោះឆ្នោតសភាតំណាងឲ្យភាគី២ ដែលត្រូវបានចាត់ទុកថា ជាសមរភូមិអត្ថិភាពដែលនឹងកំណត់ថា តើប្រទេសនេះព្រមចូលរួមយ៉ាងជិតស្និទ្ធជាមួយលោកខាងលិច ឬផ្អៀងទៅរកទីក្រុងមូស្គូ។

ការបោះឆ្នោតនេះ គឺជាការប្រកួតប្រជែងគ្នា រវាងគណបក្សកាន់អំណាច Georgian Dream ដែលបានគ្រប់គ្រងប្រទេសចាប់តាំងពីឆ្នាំ២០១២ ទល់នឹងប្លុកសំខាន់ៗចំនួន៤ ដែលតំណាងឲ្យគណបក្សប្រឆាំងគាំទ្រលោកខាងលិច។ ប្រជាជនហ្សកហ្ស៊ីប្រមាណ ៣,៥លាននាក់ មានសិទ្ធិបោះឆ្នោត។

ប្រទេសហ្សកហ្ស៊ី ដែលបានបាត់បង់ដែនដីយ៉ាងធំទៅឲ្យក្រុមផ្តាច់ខ្លួនគាំទ្រដោយរុស្ស៊ីក្នុងទសវត្សរ៍ឆ្នាំ១៩៩០ ហើយបានរងបរាជ័យនៅក្នុងការលុកលុយរបស់រុស្ស៊ីរយៈពេលខ្លីក្នុងឆ្នាំ២០០៨ គឺជារដ្ឋមួយ ក្នុងចំណោមរដ្ឋដែលគាំទ្រលោកខាងលិចបំផុតអស់រយៈពេលជាច្រើនទសវត្សរ៍មកហើយ ក្រោយកា្លយជាប្រទេសឯករាជ បន្ទាប់ពីសហភាពសូវៀតដួលរលំ។

ប៉ុន្តែចាប់តាំងពីមានការលុកលុយរបស់រុស្ស៊ីលើអ៊ុយក្រែន នៅឆ្នាំ២០២២ គណបក្ស Georgian Dream បានបង្វែរប្រទេសនេះឲ្យត្រឡប់ទៅដើរគន្លងរបស់ទីក្រុងមូស្គូវិញយ៉ាងប្រាកដប្រជា ដោយចោទប្រកាន់លោកខាងលិចថា បានព្យាយាមល្បួងខ្លួនឲ្យធ្លាក់ចូលទៅក្នុងសង្រ្គាម។ តែក្រុមប្រឆាំងបានហៅការផ្លាស់ប្តូរនេះថា ជាការក្បត់នឹងអនាគតរបស់ហ្សកហ្ស៊ី ក្នុងការបានក្លាយជាសមាជិករបស់សហភាពអឺរ៉ុប។

បណ្ដាញសារព័ត៌មានដែលមាននិន្នាការផ្ទុយគ្នា បានផ្សព្វផ្សាយលទ្ធផលស្ទង់មតិខុសគ្នាស្រឡះ ដោយប្រព័ន្ធផ្សព្វផ្សាយគាំទ្រគណបក្សប្រឆាំងបានព្យាករថា គណបក្ស Georgian Dream នឹងបាត់បង់សំឡេងភាគច្រើន តែសារព័ត៌មានគាំទ្រគណបក្សកាន់អំណាច ព្យាករពីជ័យជម្នះក្នុងសំឡេងដ៏ច្រើនលើសលប់ ជាមួយការបង្ហាញដ៏ល្អបំផុតដែលមិនធ្លាប់មានពីមុន៕