សេវាសង្គ្រោះបន្ទាន់របស់ប្រទេសអ៊ុយក្រែនបានឲ្យដឹងនៅក្នុងសេចក្តីថ្លែងការណ៍មួយថា ការវាយប្រហារដោយមីស៊ីលរបស់រុស្សី បានត្រូវចំលើលំនៅឋាន និងកន្លែងព្យាបាលមួយកន្លែង នៅកណ្តាលទីក្រុង Dnipro របស់អ៊ុយក្រែន កាលពីល្ងាចថ្ងៃសុក្រ (ទី២៥ ខែតុលា) ដោយបានបណ្ដាលឲ្យមនុស្ស ៤នាក់ ស្លាប់ និងយ៉ាងហោចណាស់ ២០នាក់ រងរបួស។

អភិបាលតំបន់ លោក Serhiy Lysak ដែលសរសេរនៅលើកម្មវិធីផ្ញើសារ Telegram បានឲ្យដឹងថា ក្មេងស្រីអាយុ ៨ឆ្នាំ និងក្មេងប្រុសជំទង់ម្នាក់ ស្ថិតក្នុងចំណោមអ្នករងរបួស។ ចំណែកសេចក្តីរាយការណ៍ពីទីក្រុង បានប្រាប់ថា ការវាយប្រហារជាច្រើន បានកើតមានក្នុងតំបន់ផ្សេងៗគ្នា នៅទីនោះ។

លោក Lysak បានប្រាប់ទៀតថា អគារកម្ពស់ ២ជាន់ ត្រូវបានបំផ្លាញដោយផ្នែកៗ ហើយមនុស្សម្នាក់ នៅតែស្ថិតនៅក្រោមគំនរបាក់បែក។ លោកបានបន្ថែមថា មន្ទីរពេទ្យមួយកន្លែង និងអគារផ្ទះល្វែងចំនួន ៤ខ្នង បានរងការខូចខាត៕