អាជ្ញាធរវៀតណាមកំពុងរៀបចំផ្អាកប្រតិបត្តិការ នៅអាកាសយានដ្ឋានចំនួន៤ ក្នុងខេត្តភាគកណ្តាលរបស់ខ្លួន ខណៈដែលប្រទេសនេះកំពុងត្រៀមប្រឈមជាមួយព្យុះត្រូពិក Trami ដែលបាននាំឲ្យមានការស្លាប់ និងការបំផ្លិចបំផ្លាញដល់ប្រទេសហ្វីលីពីនរួចហើយ។

ព្យុះ Trami នឹងបក់បោកទៅលើភាគកណ្តាលវៀតណាម ចាប់ពីថ្ងៃទី២៦ ដល់ថ្ងៃទី២៨ ខែតុលា ដែលនាំមកនូវភ្លៀងធ្លាក់ខ្លាំង ខ្យល់បក់ខ្លាំង និងអាចមានទឹកជំនន់។ អាជ្ញាធរអាកាសចរណ៍ស៊ីវិលវៀតណាម បានឲ្យដឹងនៅក្នុងសេចក្តីថ្លែងការណ៍មួយថា ការវិវត្តន៍របស់ព្យុះមានភាពស្មុគស្មាញ ហើយនឹងបង្កហានិភ័យខ្ពស់ដល់អាកាសយានដ្ឋាន។ អាកាសយានដ្ឋាន រួមទាំងអាកាសយានដ្ឋានអន្តរជាតិ Phu Bai នឹងត្រូវបិទចាប់ពីថ្ងៃទី២៧ ខែតុលា ហើយនឹងបើកដំណើរការឡើងវិញនៅថ្ងៃនោះ ឬថ្ងៃទី២៨ ខែតុលា។

បើយោងតាមមជ្ឈមណ្ឌលជាតិ សម្រាប់ការព្យាករណ៍ឧតុនិយម បានឲ្យដឹងថា ខេត្តភាគកណ្តាល ដូចជា Quang Binh, Quang Ngai និង Ha Tinh ត្រូវបានគេរំពឹងថា នឹងមានភ្លៀងធ្លាក់ខ្លាំង ចាប់ពីយប់ថ្ងៃទី២៦ ខែតុលា ដល់យប់ថ្ងៃទី២៨ ខែតុលា។ គេហទំព័រសារព័ត៌មាន VnExpress បានរាយការណ៍ថា អាជ្ញាធរបានជំរុញឲ្យមានការត្រៀមលក្ខណៈ សម្រាប់ការមានបំណាក់ដី។

គួរបញ្ជាក់ថា ព្យុះ Trami នេះ បានឆក់យកជីវិតមនុស្សយ៉ាងហោចណាស់ ៨៧នាក់ នៅក្នុងប្រទេសហ្វីលីពីន ខណៈប្រទេសប្រជុំកោះមួយនេះ កំពុងត្រៀមប្រឈមព្យុះស៊ីក្លូនថ្មីមួយទៀត និងលទ្ធភាពនៃវិលត្រឡប់មកវិញរបស់ព្យុះ Trami៕