តាកែវ ៖ថ្លែងក្នុងឱកាសបើកវេទិកាសាធារណៈដើម្បីផ្សព្វផ្សាយ និងពិគ្រោះយោបល់ ឆ្នាំទី១ អាណត្តិទី៤ របស់ក្រុមប្រឹក្សាខេត្តតាកែវ ដែលបានរៀបចំធ្វើឡើងនៅស្រុកអង្គបូរី កាលពីថ្ងៃទី២៥ ខែតុលា ឆ្នាំ២០២៤ ឯកឧត្តម អ៊ុន វណ្ណា សមាជិកក្រុមប្រឹក្សាខេត្តតាកែវ បានធ្វើការណែនាំ និងក្រើនរំលឹកដល់អាជ្ញាធរមូលដ្ឋានមានភូមិ-ឃុំ រួមនិងសមត្ថកិច្ចពាក់ព័ន្ធទាំងអស់ត្រូវបន្តសកម្មភាពចុះផ្សព្វផ្សាយ និងរួមគ្នាទប់ស្កាត់ការជួញដូរ និងប្រើប្រាស់គ្រឿងញៀនខុសច្បាប់ក្នុងមូលដ្ឋានរបស់ខ្លួនឲ្យល្អបន្តទៀតដើម្បីធានាបាននូវគោលនយោបាយភូមិឃុំមានសុវត្ថិភាពជូនពលរដ្ឋ។

 ឯកឧត្តមមានប្រសាសន៍ថា បញ្ហាគ្រឿងញៀនជាបញ្ហាសង្គមមួយដ៏រ៉ាំរៃ និងស្មុគស្មាញដែលវា បង្ករផលវិបាកជាច្រើនដល់សង្គមជាតិ រួមនិងមនុស្សទូទៅ។ ហើយការដោះស្រាយបញ្ហាគ្រឿងញៀននេះទាមទារអោយមានការចូលរួមចាប់ពីបុគ្គលម្នាក់ៗ ក្រុមគ្រួសារ សហគមន៍ អាជ្ញាធរ អង្គការជាតិ អន្តរជាតិ ដើម្បីធ្វើយ៉ាងណាឈានទៅរកការលុបបំបាត់ការប្រើប្រាស់គ្រឿងញៀននៅតាមមូលដ្ឋាន។

ឯកឧត្តមមានប្រសាសន៍បន្តថា គ្រឿងញៀនបំផ្លាញទាំងរូបរាង្គកាយ សុខភាព បញ្ញាស្មារតី និងអាចឈានដល់ការស្លាប់ទៀតផង។ បច្ចុប្បន្ននេះគ្រឿងញៀនត្រូវបានក្រុមជ្មួញបាននិងកំពុងចរាចរណ៍យ៉ាងខ្លាំងក្នុងប្រទេសកម្ពុជាក៏ដូចជាក្នុងខេត្ត តាកែវផងដែរ ដូច្នេះអាជ្ញាធរមូលដ្ឋាន កម្លាំងសមត្ថកិច្ច នឹងស្ថាប័នពាក់ព័ន្ធ ត្រូវរួមគ្នា ទប់ស្កាត់ ការជួញដូរ និងប្រើប្រាស់គ្រឿងញៀនគ្រប់ប្រភេទ ពិសេសតំបន់នៅជាប់ព្រំដែនវៀតណាម ក៏ត្រួវពង្រឹងការចេញចូលការចរាចរណ៍គ្រឿងញៀនឆ្លងដែនខុសច្បាប់ ដើម្បីពលរដ្ឋមានទំនុកចិត្ត និងធានាបាននូវគោលនយោបាលភូមិឃុំមានសុវត្ថិភាព ដែលរដ្ឋាភិបាលបានដាក់ចេញ។

 ជាការឆ្លើយតប លោក មូល វិចិត្រ អភិបាលរងខេត្តតាកែវ បានលើកឡើងថា អាជ្ញាធនឹងប្រឹងប្រែងធ្វើសកម្មភាពឲ្យកាន់តែខ្លាំងក្លាថែមទៀតដើម្បីធ្វើយ៉ាងណាទប់ស្កាត់ការប្រើប្រាស់និងចែកចាយគ្រឿងញៀននៅក្នុងមូលដ្ឋានជាពិសេសនឹងបន្តផ្សព្វផ្សាយដល់បងប្អូនប្រជាពលរដ្ឋចូលរួមសហការជាមួយអាជ្ញាធរ៕