ប្រមុខអង្គការសុខភាពពិភពលោកបានព្រមានកាលពីថ្ងៃសៅរ៍ ២៦ ខែតុលា អំពីស្ថានភាពដ៏មហន្តរាយនៅភាគខាងជើងនៃតំបន់ហ្កាហ្សាដែលបំផ្លិចបំផ្លាញដោយសង្រ្គាម ខណៈប្រតិបត្តិការយោធាដ៏ខ្លាំងក្លាកំពុងឡោមព័ទ្ធជុំវិញតំបន់នេះ និងក្នុងមណ្ឌលថែទាំសុខភាព។

ទីភ្នាក់ងារសារព័ត៌មានផ្លូវការប៉ាឡេស្ទីន WAFA បានរាយការណ៍ថាជនជាតិប៉ាឡេស្ទីនយ៉ាងហោចណាស់៣០នាក់ ត្រូវបានសម្លាប់កាលពីល្ងាចថ្ងៃសៅរ៍ ដោយសារការទម្លាក់គ្រាប់បែករបស់អ៊ីស្រាអែលលើទីប្រជុំជន បេត ឡាហ៊ីយ៉ា ( Beit Lahia) ក្នុងតំបន់ហ្កាហ្សាភាគខាងជើង។  

លោក Tedros Adhanom Ghebreyesus បាននិយាយនៅលើបណ្ដាញសង្គម X ដោយព្រមានថា ស្ថានភាពនៅភាគខាងជើងដែនដីហ្កាហ្សា គឺធ្លាក់ក្នុងស្ថានភាពគ្រោះថ្នាក់ដ៏មហន្តរាយ ហើយកង្វះខាតការផ្គត់ផ្គង់វេជ្ជសាស្រ្តធ្ងន់ធ្ងរ កំពុងធ្វើឱ្យមនុស្សបាត់បង់ការថែទាំសង្គ្រោះជីវិត។

លោកបានគូសបញ្ជាក់អំពីមន្ទីរពេទ្យ Kamal Adwan ដែលជាមន្ទីរពេទ្យដំណើរការចុងក្រោយរបស់ភាគខាងជើងហ្កាហ្សា ត្រូវបានវាយប្រហារដោយកងកម្លាំងអ៊ីស្រាអែលកាលពីថ្ងៃសុក្រ នេះបើយោងតាមក្រសួងសុខាភិបាលរបស់ហ្កាហ្សា។  

ក្រសួងនេះបានចោទប្រកាន់ថា ការវាយឆ្មក់លើទីតាំងនៅក្នុងជំរំ Jabalia ជាទីដែលអ៊ីស្រាអែលបើកប្រតិបត្តិការដ៏ធំមួយកាលពីដើមខែនេះ បានធ្វើឱ្យកុមារពីរនាក់ស្លាប់។

ក្រសួងខាងលើបានចោទប្រកាន់កងកម្លាំងអ៊ីស្រាអែលថាបានឃាត់ខ្លួនបុគ្គលិករាប់រយនាក់ អ្នកជំងឺ និងជនភៀសខ្លួនក្នុងអំឡុងពេលវាយឆ្មក់នោះ៕