ការវាយប្រហាររបស់ក្រុមជនអន្ធពាលនៅរដ្ឋធានី ព័រ-អូ-ប្រាំង(Port-au-Prince) បានបង្ខំអ្នកស្រុកឱ្យរត់ភៀសខ្លួនចេញពីផ្ទះសម្បែងរបស់ពួកគេកាលពីថ្ងៃសៅរ៍ ២៦ តុលា ខណៈក្រុមជនអន្ធពាលដែលកំពុងប្រតិបត្តិការនៅក្នុង និងជុំវិញរដ្ឋធានីហៃទី បង្កើនការវាយប្រហារលើតំបន់ដែលពួកគេមិនទាន់បានគ្រប់គ្រង។ 

ផ្សែងចេញពីការប្រយុទ្ធគ្នាបានគ្របដណ្ដប់លើសង្កាត់ Solino នៃរដ្ឋធានី ជាទីដែលអ្នកស្រុកកំពុងរត់គេចខ្លួន កំពុងដឹកជញ្ជូនរបស់សំខាន់ៗ ដូចជាគ្រឿងសង្ហារិម ពូក ចំណីអាហារ និងទ្រព្យសម្បត្តិផ្សេងទៀតទៅកាន់រថយន្តដឹកទំនិញ។  

ចំណែកអ្នកខ្លះទៀតរត់គេចដោយថ្មើរជើង ដោយមានត្រឹមរបស់របរដែលពួកគេអាចទូល ឬ កាន់បានតែប៉ុណ្ណោះ។ក្រុមជនអន្ធពាលបាននិងកំពុងបង្កើនការវាយប្រហាររបស់ពួកគេទៅលើទីប្រជុំជនមួយចំនួនក្នុង និងជុំវិញរដ្ឋធានី ដែលភាគច្រើននៃទីក្រុង និងជាយក្រុងរបស់រដ្ឋធានីនេះ ស្ថិតនៅក្រោមការគ្រប់គ្រងរបស់ក្រុមប្រដាប់អាវុធហិង្សាផ្សេងៗដែលរួបរួមគ្នាក្រោមសម្ព័ន្ធភាពធំមួយត្រូវគេស្គាល់ថា វីវ អង់សាម(Viv Ansanm) ។ 

កម្មវិធីស្បៀងអាហារពិភពលោក (WFP) របស់អង្គការសហប្រជាជាតិបាននិយាយនៅក្នុងសន្និសីទសារព័ត៌មានកាលពីថ្ងៃសុក្រ ២៥ តុលា ថានៅទីក្រុង Solino អ្នកស្រុករាប់ពាន់នាក់ត្រូវបានរត់ភៀសខ្លួនក្នុងរយៈពេលប៉ុន្មានថ្ងៃថ្មីៗនេះ រួមទាំងមនុស្សដែលត្រូវបានរត់ភៀសខ្លួនពីតំបន់នានាផ្សេងទៀត រួចទៅហើយ។ 

អង្គការ WFP បាននិយាយថាចំនួនអ្នករត់គេចពីជម្លោះសរុបនៅក្នុងប្រទេសហៃទីបានកើនឡើងទ្វេដងក្នុងរយៈពេលបីខែចុងក្រោយនេះរហូតដល់ជិត៧០០.០០០នាក់៕