(កណ្ដាល)៖ នៅថ្ងៃ ២៦-២៧ ខែតុលា ឆ្នាំ២០២៤ មហាឧបាសក ទ្រី ភី និងមហាឧបាសិកា កែម ញ៉ ដែលជាមាតាបិតា លោកអ្នកឧកញ៉ា ទ្រី ភាព និងលោកជំទាវ អ្នកឧកញ៉ា គៀន ស្រីនាង បានប្រារព្ធពិធីបុណ្យកឋិនទាន នាទីអារាមវត្តអង្គព្រោជ ភូមិអង្គខ្លើ ឃុំត្បែង ស្រុកកណ្ដាលស្ទឹង ខេត្តកណ្ដាលដោយមានការចូលរួមយ៉ាងច្រើនកុះករពី

ក្រុមការងារ និងបុគ្គលិកគ្រប់លំដាប់ថ្នាក់នៃក្រុមហ៊ុន ទ្រី ភាព គ្រុប។

ពិធីបុណ្យកឋិនទាននៅវត្តអង្គព្រោជ ដែលរៀបចំឡើងដោយ លោកអ្នកឧកញ៉ា បណ្ឌិត ទ្រី ភាព និងអ្នកឧកញ៉ា គៀន ស្រីនាង បានប្រារព្ធធ្វើឡើងពីរថ្ងៃ នៅថ្ងៃ២៦-២៧ ខែតុលា ដោយមានការចូលរួមពី មហាឧបាសក ទ្រី ភី និងមហាឧបាសិកា កែម ញ៉ ដែលជាមាតាបិតា របស់លោកអ្នកឧកញ៉ា។

វិធីបុណ្យអង្គកថិនទានបានប្រព្រឹត្តទៅតាមកន្លងប្រពៃណីព្រះពុទ្ធសាសនាដោយមានពិធី ក្រុងពាលី បូជាគ្រឿងសក្ការៈថ្វាយព្រះពុទ្ធរូប នមស្ការថ្វាយបង្គំព្រះរតនត្រៃ សមាទានសីល និមន្តព្រះសង្ឃចម្រើនព្រះបរិត្ត និងសម្ដែងព្រះធម៌ទេសនា។

លុះព្រឹកឡើង ថ្ងៃអាទិត្យ ១០ រោច ខែអស្សុជ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៧ ខែតុលា ឆ្នាំ២០២៤ ប្រគេនយាគូដល់ព្រះសង្ឃ ដង្ហែរអង្គកឋិនទាន ប្រទក្សិណ ៣ជុំព្រះវិហារ រួចវេរអង្គកឋិនប្រគេនព្រះសង្ឃក្រាលគ្រងទៅតាមព្រះវិន័យកិច្ច ក្នុងព្រះវិហារ ព្រមទាំងបវរណាបច្ច័យសង្កត់ត្រៃចំនួន​ ១០០.០០០.០០០​ដែលក្នុងនោះបច្ច័យត្រៃធំរបស់​លោកអ្នកឧកញ៉ា​ និងលោកជំទាវ​ អ្នកឧកញ៉ា​ចំនួ​ន​៤៤.៦៣០.០០០ រៀល​ និង​បច្ច័យប្រគេនព្រះសង្ឃក្នុងពិធីបុណ្យកឋិនទាននេះចំនួន​ ៥៥.៣៧០.០០០រៀល។ ឆ្លៀតក្នុងឱកាសនេះដែរ លោកអ្នកឧកញ៉ា និង លោកជំទាវ អ្នកឧកញ៉ា ក៏បានប្រគេនបច្ច័យសម្រាប់កសាងដល់់វត្តចំនួនពីរទៀតផងដែរគឺ វត្តពោធិ៍សាត់ និង វត្តទេពបុរី ដែលក្នុងមួយវត្តៗចំនួន ១០.០០០.០០០ រៀល។

ក្រៅពីបច្ច័យសង្កត់ត្រៃហើយ ក៏មានបច្ច័យបួនប្រគេនព្រះសង្ឃ និងការចំណាយផ្សេងៗទៀតផងដែរ ដែលសរុបជាថវិកាអស់ប្រមាណជាង ១៧៩.០០០.០០០ (មួយរយចិតសិបប្រាំបួនលាន)​ រៀល។

ស្ថិតនៅក្នុងពីធីបុណ្យអង្គកឋិនទាននេះ មហាឧបាសក ទ្រី ភី និងមហាឧបាសិកា កែម ញ៉ បានបរិច្ចាគ ពុទ្ធបូជា ធម្មបូជា សង្ឃបូជា នៃអានិសង្ស បុណ្យកឋិនទាន ឧទ្ទិសកុសលផលបុណ្យថ្វាយ ប្រគេន និងជូនចំពោះបុព្វការីជន មានមាតាបិតា គ្រូបាអាចារ្យ ជីដូនជីតា ញាតិសន្តានទាំងឡាយ បានរួចចាកទុក្ខ និងបានបដិសន្ធិវិញ្ញាណ ក្នុងសុគតិភពមានមនុស្ស ទេវតា និងព្រះនិព្វាន និងសូមឱ្យផលបុណ្យដែលកើតឡើងពីអានិសង្សអង្គកឋិនទាននេះ បានផ្សព្វផ្សាយជូនឯកឧត្តម លោកជំទាវ លោក លោកស្រី ឧបាសក ឧបាសិកាមហាពុទ្ធបរិស័ទជិតឆ្ងាយជាម្ចាស់នៃទាន សូមបានសេចក្ដីសុខចម្រើនសម្រេចដោយព្រះពុទ្ធពរ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតទៅជាបការៈដទៃឡើយ ៕