មនុស្សម្នាក់បានស្លាប់ និងរាប់សិបនាក់ផ្សេងទៀត បានរងរបួស កាលពីថ្ងៃអាទិត្យ ទី២៧ ខែតុលា នៅពេលដែលរថយន្តដឹកទំនិញមួយគ្រឿង បានបំបុកចូលចំណតរថយន្តក្រុងមួយកន្លែងនៅផ្លូវបំបែកមួយជិតទីក្រុង Tel Aviv ភាគកណ្តាលប្រទេសអ៊ីស្រាអែល ជាអ្វីដែលនគរបាលសង្ស័យថា ជាការវាយប្រហារភេរវកម្ម។

នគរបាលអ៊ីស្រាអែល និយាយថា មនុស្សប្រហែល ៤០នាក់ បានរងរបួសក្នុងស្ថានភាពខុសៗគ្នា ក្នុងនោះមានមួយចំនួនធ្ងន់ធ្ងរ ត្រូវបានគេបញ្ជូនទៅកាន់មន្ទីរពេទ្យនៅក្បែរនោះ។

មជ្ឈមណ្ឌលវេជ្ជសាស្ត្រ Ichilov ក្នុងទីក្រុង Tel Aviv បាននិយាយថា ជនរងគ្រោះម្នាក់បានស្លាប់ដោយសារតែរងរបួសធ្ងន់។ ឧបទ្ទវហេតុដែលរថយន្តដឹកទំនិញ បានបើកបំបុកចូលទៅក្នុងចំណតរថយន្តក្រុង នៅជិតមូលដ្ឋានយោធាមួយកន្លែងបានកើតឡើងនៅប្រហែលម៉ោង១០ព្រឹក ម៉ោងក្នុងស្រុក នគរបាលនិយាយថា អ្នកបើកបរមានសញ្ជាតិអ៊ីស្រាអែល ត្រូវបានរារាំងដោយការបាញ់កាំភ្លើងពីសំណាក់ជនស៊ីវិលនៅក្បែរនោះ។

រដ្ឋមន្ត្រីក្រសួងសន្តិសុខជាតិអ៊ីស្រាអែល លោក Itamar Ben-Gvir បានប្រាប់អ្នកសារព័ត៌មាន នៅពេលលោកទៅដល់កន្លែងកើតហេតុថា ឧប្បត្តិហេតុនេះ ត្រូវបានស៊ើបអង្កេតថាជាការវាយប្រហារ ហើយនោះជារបៀបដែលនឹងត្រូវបានស៊ើបអង្កេតបន្ថែមទៀត។

លោកផ្តល់ការគាំទ្រយ៉ាងពេញលេញសម្រាប់ទាំងនគរបាល និងប្រជាជន ដែលបានរារាំងជនបង្ក ជាអ្នកវាយប្រហារ។

ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា អ្នកបើកបររថយន្ត ជាជនជាតិអារ៉ាប់អ៊ីស្រាអែល មកពីទីក្រុង Qalansawe នៅភាគកណ្តាលប្រទេសអ៊ីស្រាអែល។