ភ្នំពេញ ÷ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ផ្តួចផ្តើមនៅក្នុងកម្មវិធីពិព័រណ៍ការងារ និងផលិតភាពជាតិ ដើម្បីលើកកម្ពស់ និងការពង្រឹងអ្នកបច្ចេកទេស ICT ជំនាន់ក្រោយ ឱ្យទទួលបាននូវចំណេះជំនាញកាន់តែខ្លាំងក្លា។

ពិព័រណ៍ការងារ និងផលិតភាពជាតិ ដែលប្រារព្ធឡើងចាប់ពីថ្ងៃទី ២៦ ដល់ថ្ងៃទី ២៧ ខែ តុលា ឆ្នាំ ២០២៤ បានទទួលការ ចាប់អារម្មណ៍យ៉ាងខ្លាំង ចំពោះគម្រោង "Building Capacity and Establishing an Enabling Environment in ICT Majors of TVET in Cambodia"។ គំនិតផ្តួចផ្តើមនេះត្រូវបានគាំទ្រដោយទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងអនុវត្តដោយ មជ្ឈមណ្ឌលផលិតភាពកូរ៉េ (KPC) និងសាកលវិទ្យាល័យ Sangmyung (SMU) សម្រាប់ការប្រឹក្សាយោបល់លើការគ្រប់គ្រង គម្រោង។ នៅក្នុងមហាព្រឹត្តិការណ៍នេះ តាមរយៈគម្រោងខាងលើ ក៏បានចូលរួមចំណែកគាំទ្រដល់វិទ្យាស្ថាន TVET ចំនួន ៥ នៅរាជធានីភ្នំពេញដូចជា NPIC, NTTI, NIB, PPI និង ITI ដែលក្នុងនោះរួមបញ្ចូលសកម្មភាព ការផ្តល់ព័ត៌មានអំពីគម្រោង ដល់អ្នកចូលរួមទស្សនា ការធ្វើបទបង្ហាញគម្រូបច្ចេកទេស ICT និងការស្ទង់មតិអំពីជំនាញ ICT។

ជុំវិញការផ្សព្វផ្សាយពីជំនាញ ICT ចំនួន ៥ ទីតាំងខាងលើ ដែលគាំទ្រដោយទីប្រឹក្សាគ្រប់គ្រងគម្រោង (PMC) បាន ទាក់ទាញអ្នកចូលរួមប្រមាណ ១ ពាន់នាក់ ក្រោមសកម្មភាពយ៉ាងសកម្មរួមមាន ការផ្តល់ព័ត៌មានដ៏មានតម្លៃអំពីកម្មវិធីសិក្សា ICT របស់វិទ្យាស្ថាន និងឧត្តមភាពរបស់វិទ្យាស្ថាននីមួយៗផងដែរ ក្នុងនោះស្តង់នីមួយៗបានបង្កើតនូវសកម្មភាពកម្សាន្ត ភ្ជាប់នឹងចំណេះ ដឹងផ្សេងៗដូចជា ការដាក់តាំងបង្ហាញនូវគំរូស្នាដៃបច្ចេកទេស ICT របស់សិក្ខាកាម ក្នុងគោលបំណងជំរុញឱ្យមានចំណាប់អារម្មណ៍ អ្នកចូលរួមទស្សនា និងបង្កើនការយល់ដឹងអំពីគម្រោងឲ្យកាន់តែស៊ីជម្រៅផងដែរ។ លើសពីនេះ, ក្រុមការងារគម្រោង បានចុះទៅកាន់ ក្រុមហ៊ុន និងស្ថាប័ននានា ដើម្បីស្រង់មតិវាយតម្លៃ ពីតម្រូវការការងារក្នុងវិស័យ ICT នាពេលអនាគត សម្រាប់អ្នកសិក្សាជំនាញ ICT និងកំណត់មុខជំនាញជាក់លាក់ ដែលទីផ្សារការងារកំពុងមានតម្រូវការ។ គោលបំណងនេះ គឺដើម្បីស្វែងរកឱកាសកម្មសិក្សា សម្រាប់ អ្នកសិក្សាបច្ចេកទេស ICT ដែលត្រូវបានបណ្តុះបណ្តាលតាមរយៈគម្រោង និងការផ្តល់សេវាកម្មក្នុងវគ្គបណ្តុះបណ្តាល ដើម្បីបង្កើន ប្រសិទ្ធភាពរបស់គម្រោង។

ចាប់តាំងពីឆ្នាំ ២០១១ ទីភ្នាក់ងារជាតិមុខរបរ និងការងារ (NEA) បានរៀបចំពិព័រណ៍ការងារចំនួន ១២ លើក ត្រូវបានទទួល ស្គាល់ថា ជាព្រឹត្តិការណ៍ប្រចាំឆ្នាំដ៏ធំបំផុតនៅក្នុងទីផ្សារការងារ។ អ្នកចូលរួមជិត ៣ ម៉ឺននាក់ ក៏បានស្វែងរកឱកាសការងារ តាមរយៈ ព្រឹត្តិការណ៍នេះជារៀងរាល់ឆ្នាំ ហើយនៅឆ្នាំនេះមានក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំប្រមាណ ១៥០ កន្លែង និងជាង ១៨០ ស្តង់ បានដាក់បង្ហាញពីឱកាសការងារយ៉ាងទូលំទូលាយ, សរុបមានរហូតដល់ ៣ម៉ឺនមុខតំណែង។

ទាក់ទិនព្រឹត្តិការណ៍ខាងលើនេះ, ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមជាមួយនឹងអ្នក តំណាងមកពីភ្នាក់ងារសហប្រតិបត្តិការអន្តរជាតិកូរ៉េ (KOICA) ដៃគូអភិវឌ្ឍន៍ និងអង្គការក្រៅរដ្ឋាភិបាលផ្សេងទៀត បានចូលរួមក្នុង ព្រឹត្តិការណ៍នេះ យ៉ាងច្រើនកុះករផងដែរ។

តាមរយៈនេះ (KOICA) កំពុងគាំទ្រគម្រោង "Building Capacity and Establishing an Enabling Environment in ICT Majors of TVET in Cambodia" ដែលមានរយៈពេលចាប់ពីឆ្នាំ ២០២៣ ដល់ឆ្នាំ ២០២៧ ។ គម្រោងនេះផ្តោតលើការ កម្ពស់គុណភាពនៃការអប់រំនៃវិស័យ TVET តាមរយៈការពង្រឹងកម្មវិធីសិក្សាលើជំនាញ ICT, ការបង្កើនសមត្ថភាពលើជំនាញICT, និង ការផ្តល់នូវបរិយាកាសអប់រំដ៏ប្រណីត សសម្រាប់អនុវត្តលើជំនាញ ICT និងការគាំទ្រកម្មវិធីពិព័រណ៍ការងារ។ លើសពីពិព័រណ៍ការងារ និងផលិតភាពជាតិ គម្រោងនេះនឹងចូលរួមយ៉ាងសកម្ម នៅក្នុងព្រឹត្តិការណ៍ជាតិផ្សេងៗទៀត ដើម្បីបង្ហាញពីសមិទ្ធិផលរបស់ខ្លួន រួមទាំងលើកកម្ពស់ដល់សិក្ខាកាម នៅក្នុងស្ថាប័ន TVET ផងដែរ៕