មន្ត្រីជាន់ខ្ពស់អង្គការសហប្រជាជាតិក្នុងប្រទេសស៊ូដង់ សម្ដែងក្ដីបារម្ភយ៉ាងខ្លាំងចំពោះរបាយការណ៍នៃ “ឧក្រិដ្ឋកម្មដ៏ឃោរឃៅ" នៅក្នុងរដ្ឋ ហ្កេហ្ស៊ីរ៉ា (Gezira) ភាគកណ្តាល រួមទាំងការសម្លាប់រង្គាលលើជនស៊ីវិលយ៉ាងច្រើនដោយកងកម្លាំងគាំទ្ររហ័សយោធា (RSF)។

លោកស្រី ក្លេមែនធីន ក្វេតា-សាឡាមី (Clementine Nkweta-Salami) បានលើកឡើងបែបនេះបន្ទាប់ពីក្រុមសកម្មជនមួយបាននិយាយថា យ៉ាងហោចណាស់មនុស្ស ១២៤នាក់ ត្រូវបានសម្លាប់ដោយកងកម្លាំង RSF នៅក្នុងការវាយប្រហារលើភូមិនានាកាលពីសប្តាហ៍មុន។ RSF បានបដិសេធការកំណត់គោលដៅជនស៊ីវិល ដោយនិយាយថា កងកម្លាំងរបស់ខ្លួនប្រយុទ្ធតែជាមួយកងជីវពលប្រដាប់អាវុធរបស់យោធាប៉ុណ្ណោះ។

លោកស្រី Nkweta-Salami អ្នកសម្របសម្រួលអង្គការសហប្រជាជាតិ និងមនុស្សធម៌នៅស៊ូដង់ បាននិយាយថា របាយការណ៍បឋមបង្ហាញថាកងកម្លាំង RSF បានធ្វើការវាយប្រហារដ៏ធំមួយនៅទូទាំងរដ្ឋរវាងថ្ងៃទី២០ និង២៥ ខែតុលា។ លោកស្រីបន្តថា ការប្រយុទ្ធនោះនាំឱ្យមានការសម្លាប់រង្គាល ដោយបន្ថែមថាចំនួនអ្នកស្លាប់នៅតែមិនច្បាស់លាស់ ប៉ុន្តែរបាយការណ៍បឋមបង្ហាញថា មនុស្សលើសពី ១០០នាក់ត្រូវបានសម្លាប់នៅក្នុងរដ្ឋ Gezira ។

ជម្លោះរយៈពេល ១៨ខែនៅស៊ូដង់ បានសម្លាប់មនុស្សរាប់ម៉ឺននាក់ និងជាង ១១លាននាក់បានភៀសខ្លួន។ រដ្ឋ Gezira បានក្លាយជាសមរភូមិដ៏សំខាន់មួយកាលពីសប្តាហ៍មុន បន្ទាប់ពីកងកម្លាំង RSF បានរងការវាយប្រហារយ៉ាងធ្ងន់ធ្ងរ នៅពេលដែលមេបញ្ជាការម្នាក់របស់ខ្លួនបានរត់ចោលជួរទៅចូលរួមជាមួយយោធាស៊ូដង់ដែលជាគូប្រជែង៕