គណបក្ស GERB និយមកណ្តាលរបស់ប្រទេសប៊ុលហ្គារី បាននាំមុខ បន្ទាប់ពីការបោះឆ្នោតសភា កាលពីថ្ងៃអាទិត្យ ទី២៧ ខែតុលា ជាការស្ទង់មតិក្រោយការបោះឆ្នោតបានបង្ហាញ ប៉ុន្តែគណបក្សនេះនឹងត្រូវស្វែងរកដៃគូចម្រុះដើម្បីបង្កើតរដ្ឋាភិបាល។

ការស្ទង់មតិរបស់អង្គការ Alpha Research បានបង្ហាញថា គណបក្ស GERB ទទួលបានសំឡេងគាំទ្រ២៦,៤% ខណៈគណបក្សអ្នកកែទម្រង់ យើងបន្តផ្លាស់ប្តូរ ឬ We Continue the Change (PP) ត្រូវបានគេមើលឃើញថា ឈរនៅលំដាប់ទីពីរដោយទទួលបានសំឡេង ១៤,៩% ។

គណបក្សស្រោចស្រង់ជាតិនិយមជ្រុល ត្រូវបានគេកំណត់ថានឹងឈរនៅលំដាប់លេខរៀងទី៣ដោយទទួលបានសំឡេងឆ្នោត១២,៩%។

មេដឹកនាំគណបក្ស GERB លោក Boyko Borissov បានអរគុណដល់អ្នកបោះឆ្នោតសម្រាប់ការគាំទ្ររបស់ពួកគេ និងបាននិយាយថា គណបក្សរបស់លោកនឹងបង្កើតរដ្ឋាភិបាលថ្មី ដោយនិយាយថាគណបក្សទាំងអស់គឺជាដៃគូដែលមានសក្តានុពល ។

ប្រទេសប៊ុលហ្គារី ត្រូវបានគ្រប់គ្រងដោយរដ្ឋាភិបាលជាច្រើនរយៈពេលខ្លីៗ ចាប់តាំងពីឆ្នាំ២០២០ នៅពេលដែលមានការតវ៉ាប្រឆាំងអំពើពុករលួយ ដែលបានជំរុញឲ្យបញ្ចប់ក្រុមចម្រុះដឹកនាំដោយគណបក្ស GERB ដែលការបោះឆ្នោត កាលពីថ្ងៃអាទិត្យ ជាការបោះឆ្នោតលើកទី៧ក្នុងរយៈពេល៤ឆ្នាំ បានជួបបរាជ័យដោយសារតែគណបក្សនយោបាយនានារបស់ប្រទេសប៊ុលហ្គារី ពុំបានឈានដល់ការឯកភាពលើការបង្កើតរដ្ឋាភិបាលចម្រុះ បន្ទាប់ពីការបោះឆ្នោតពុំមានការចូលរួមពេញលេញ កាលពីថ្ងៃទី៩ ខែមិថុនា។