អ្នកសារព័ត៌មានមកពីប្រទេសផ្សេងគ្នា បានធ្វើទស្សនកិច្ចស្វែងយល់ពីការអភិវឌ្ឍន៍ក្នុងតំបន់ទេសចរណ៍ដាច់ស្រយាលក្នុងខេត្តគួយចូវ ប្រទេសចិន។
តាមរយៈកម្មវិធីរៀបចំដោយមជ្ឈមណ្ឌលចិនទំនាក់ទំនងសាព័ត៌មានអន្តរជាតិ (CIPCC) អ្នកសារព័ត៌មានមកពីប្រទេសផ្សេងគ្នាក្នុងតំបន់អាស៊ី-ប៉ាស៊ីហ្វិក បូករួមទាំងកម្ពុជា បានធ្វើទស្សនកិច្ចទៅកាន់ខេត្តគួយចូវ ដែលជាខេត្តមួយកំពុងមានការអភិវឌ្ឍន៍លើហេដ្ឋារចនាសម្ព័ន្ធ វិទ្យាសាស្រ្ត និងបច្ចេកវិទ្យា។
បន្ទាប់ពីបានបំពេញទស្សនកិច្ចរយៈពេលជិត១សប្តាហ៍ នៅថ្ងៃទី២៧ ខែតុលា ឆ្នាំ២០២៤ម្សិលមិញនេះ បានទទួលការសំណេះសំណាល និងពិភាក្សាគ្នាក្រោមប្រធានបទ សារព័ត៌មានក្នុងតំបន់អាស៊ី-ប៉ាស៊ីហ្វិកចូលរួមចែករំលែក និងបង្កើតឱកាសក្នុងខេត្តគួយចូវ។ ពិធីសំណេះសំណាលនេះបានអញ្ជើញដោយ លោក លូ យ៉ុងហ្សឹង សមាជិកគណៈកម្មាធិការអចិន្ត្រៃយ៍ នៃសភាប្រជាជនចិន នៃខេត្តគួយចូវ និងប្រតិភូមកពីគណៈកម្មធិការអចិន្រ្តៃយ៍ពាក់ព័ន្ធដូចជា ការវិនិយោគ ឧស្សាហ៍កម្ម និងទេសចរណ៍។
លោក លូ យ៉ុងហ្សឹង បានសម្តែងការស្វាគមន៍យ៉ាងកក់ក្តៅចំពោះការបំពេញទស្សនកិច្ចរបស់អ្នកសារព័ត៌មានមកពីប្រទេសផ្សេងគ្នាក្នុងតំបន់អាស៊ី-ប៉ាស៊ីហ្វិក។ លោក មានប្រសាសន៍ថា ទស្សនកិច្ចនេះពិតជាមានសារៈសំខាន់ ដើម្បីទទួលបានបទពិសោធន៍ និងការពិភាក្សាគ្នាទៅវិញទៅមកក្នុងការរៀបចំនៃការអភិវឌ្ឍន៍ខេត្តឱ្យខេត្តទៅជាតម្រូវការមួយកាន់តែទូលំទូលាយដល់បណ្តាលើសកលលោក។
ជាមួយគ្នា សមាជិកគណៈកម្មាធិការអចិន្ត្រៃយ៍នៃសភាប្រជាជនចិននៃខេត្តគួយចូវ មានប្រសាសន៍ទៀតថា ទោះបីប្រទេសចិនមានកំណើនការអភិវឌ្ឍន៍យ៉ាងរហ័សក្តី ប៉ុន្តែក៏នៅមានខេត្តមួយចំនួនស្ថិតក្នុងការអភិវឌ្ឍន៍ដូចគ្នា ជាពិសេសខេត្តគួយចូវដែលកំពុងផ្តោតសំខាន់លើហេដ្ឋារចនាសម្ព័ន្ធ ដោយសារជាតំបន់សំបូរទៅដោយភ្នំខ្ពស់ និងការរស់របស់ប្រជាជនជនជាតិភាគតិចនៅដច់ស្រយាល។
ក្នុងពិធីសំណេះសំណាលនោះ ក៏មានការពិភាក្សាអំពីការគ្រប់គ្រង និងអភិរក្សជនជាតិដើមភាគតិចក្នុងមូលដ្ឋាន ដោយសារប្រទេសលើសកលលោកសុទ្ធសឹងមានជនជាតិដើមភាគតិចរបស់ខ្លួន។ លោក លូ យ៉ុងហ្សឹង បញ្ជាក់ថា ដើម្បីធានាបានប្រពៃណី និងទំនៀមទំលាប់របស់ជនជាតិដើមភាគតិច រដ្ឋាភិបាលខេត្តគួយចូវបានកំណត់ឱ្យយកទំនៀមទំលាប់ វប្បធម៌ទាំងអស់របស់ខ្លួនដាក់បញ្ជូលក្នុងកម្មវិធីសិក្សាចាប់ពីថ្នាក់អនុវិទ្យាល័យ ដើម្បីធ្វើយ៉ាងណាឱ្យយុវជនចូលរួមថែរក្សា និងធានាពីប្រពៃណីផងដែរ។
លោក សេក ឧត្តម អ្នកសារព័ត៌មានមកពីប្រទេសកម្ពុជា លើកឡើងថា តាមរយៈការបំពេញទស្សនកិច្ចកន្លងមកនេះ ចិនពិតជាមានការយកចិត្តទុកដាក់ខ្ពស់លើការតភ្ជាប់ហេដ្ឋារចនាសម្ព័ន្ធ ដែលជាអត្ថប្រយោជន៍មិនត្រឹមតែការដឹកជញ្ជូន ពាណិជ្ជកម្ម និងទំនាក់ទំនងរវាងប្រជាជន និងប្រជាជន។
អ្នកសារព័ត៌មានមកពីប្រទេសកម្ពុជារូបនេះ បានសម្តែងការគាំទ្ររបស់សមាជិកគណៈកម្មាធិការអចិន្ត្រៃយ៍សភាប្រជាជនចិននៃខេត្តគួយចូវ ចំពោះការរៀបចំកម្មវិធីសិក្សាពាក់ព័ន្ធនឹងជនជាតិដើមភាគតិចបញ្ជូលកម្មវិធីសិក្សា ដែលជាចលនាចូលរួមជំរុញការអភិរក្ស និងទាក់ទាញទេសចរណ៍អន្តរជាតិទស្សនាស្វែងយល់ពីជនជាតិដើមភាគតិច។
សូមជម្រាបថា រយៈពេលជិតមួយសប្តាហ៍នេះ អ្នកសារព័ត៌មានទាំងអស់បានទៅដល់ភូមិជនជាតិដើមភាគតិច ឈ្មោះ ម៉េវ (Miao) ដែលជាកន្លែងទេសចរណ៍ប្រពៃណី, ភ្នំឈានលីង (Qiangling Mountain),សាលាបណ្តុះបណ្តាលវិជ្ជាជីវៈឈីងហ្សិន (Qingzhen Vocational Education)៕ អត្ថបទ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
