ក្រុមហ៊ុន McDonald's បាននិយាយកាលពីថ្ងៃអាទិត្យថា បន្ទះសាច់គោនៅក្នុងប៊ឺហ្គឺ Quarter Pounder ពុំមែនជាប្រភពនៃការផ្ទុះឡើងវីរុស E. coli ដែលបានបណ្តាលឲ្យមនុស្សម្នាក់ស្លាប់ និងធ្លាក់ខ្លួនឈឺប្រមាណ៧៥នាក់ នោះទេ។ ក្រុមហ៊ុនផ្គត់ផ្គង់អាហារទាន់ចិត្តនេះ និយាយថា វាប្រាកដណាស់ថាអាហារដែលមានផ្ទុកវីរុស ត្រូវបានដកចេញពីខ្សែច្រវ៉ាក់ផ្គត់ផ្គង់អាហាររបស់ខ្លួនរួចហើយ ហើយពុំមាននៅក្នុងបណ្តាភោជនីយដ្ឋាន ទៀតទេ។

ក្រសួងកសិកម្មរដ្ឋ Colorado បាននិយាយថា រាល់សំណាកនៃបន្ទះសាច់គោរបស់ក្រុមហ៊ុន McDonald's បានធ្វើតេស្តអវិជ្ជមានចំពោះវីរុស E. coli ។ ក្រសួងបាននិយាយបន្ថែមថា ការធ្វើតេស្តសាច់គោត្រូវបានធ្វើរួចហើយ ហើយមិនរំពឹងទុកថានឹងមានសំណាកសម្រាប់ការធ្វើតេស្តបន្ថែមទៀតទេ។

ភោជនីយដ្ឋានផ្គត់ផ្គង់អាហារទាន់ចិត្តរបស់សហរដ្ឋអាមេរិក បានដកខ្ទឹមបារាំងស្រស់ចេញពីបញ្ជីរាយមុខម្ហូបរបស់ពួកគេ បន្ទាប់ពីត្រូវបានគេកំណត់ថា ទំនងជាប្រភពនៃការផ្ទុះឡើងវីរុស។

វីរុស E. coli ត្រូវបានសម្លាប់នៅក្នុងសាច់គោខណៈត្រូវបានចម្អិនត្រឹមត្រូវ ប៉ុន្តែនៅក្នុងប៊ឺហ្គឺ Quarter Pounder របស់ក្រុមហ៊ុន McDonald's រួមមានខ្ទឹមបារាំងឆៅ។

ភោជនីយដ្ឋាន ដែលរងផលប៉ះពាល់ទាំងអស់ បច្ចុប្បន្ននេះ កំពុងបម្រើប៊ឺហ្គឺដោយគ្មានខ្ទឹមបារាំង។ ចាប់តាំងពីឧបទ្ទវហេតុនេះកើតឡើង ក្រុមហ៊ុន McDonald's បានដកប៊ឺហ្គឺ Quarter Pounder ចេញពីភោជនីយដ្ឋានប្រហែល២០% ក្នុងចំណោមភោជនីយដ្ឋាននៅសហរដ្ឋអាមេរិករបស់ខ្លួន។

ការផ្ទុះឡើងវីរុស E. coli កាលពីពេលមុន បានធ្វើឱ្យប៉ះពាល់ដល់ការលក់នៅហាងបម្រើអាហារទាន់ចិត្តធំៗ ខណៈអតិថិជននៅឆ្ងាយពីហាងដែលរងផលប៉ះពាល់។

ក្រុមហ៊ុន McDonald's និយាយថា ក្នុងពេលឆាប់ៗនេះ ក្រុមហ៊ុននឹងចាប់ផ្តើមបម្រើប៊ឺហ្គឺ Quarter Pounders ម្តងទៀត ហើយនឹងបម្រើនៅក្នុងភោជនីយដ្ឋានទាំងអស់ ក្នុងសប្តាហ៍ខាងមុខនេះ។