រដ្ឋមន្ត្រីការបរទេសនៃប្រទេសសម្ព័ន្ធមិត្តសំខាន់ៗមួយចំនួនរបស់អ៊ីស្រាអែល ដែលមានកាណាដា អូស្ត្រាលី បារាំង អាល្លឺម៉ង់ ជប៉ុន កូរ៉េខាងត្បូង និងចក្រភពអង់គ្លេស ចេញសេចក្តីថ្លែងការណ៍រួមមួយដែលបង្ហាញពី «ការព្រួយបារម្ភធ្ងន់ធ្ងរ» លើសេចក្តីព្រាងច្បាប់ នៅក្នុងសភា Knesset ដែលមានគោលបំណងហាមឃាត់ដល់ការផ្តល់ជំនួយសង្គ្រោះរបស់អង្គការសហប្រជាជាតិ (UN) និងទីភ្នាក់ងារការងារ សម្រាប់ជនភៀសខ្លួនប៉ាឡេស្ទីន នៅដើមបូព៌ា (UNRWA) កុំឲ្យធ្វើប្រតិបត្តិការ នៅប្រទេសអ៊ីស្រាអែល ឬធ្វើការជាមួយមន្ត្រីអ៊ីស្រាអែល។

បណ្ដាមន្ត្រីទាំងនោះ លើកឡើងថា៖ «UNRWA ផ្តល់ជំនួយមនុស្សធម៌ និងសេវាមូលដ្ឋានសំខាន់ៗ និងសង្គ្រោះជីវិតដល់ជនភៀសខ្លួនប៉ាឡេស្ទីន នៅតំបន់ហ្កាហ្សា ហ្សេរុយសាឡឹមខាងកើត តំបន់វេសបែង និងទូទាំងតំបន់នេះ។ បើមិនមានការងាររបស់ពួកគេទេ ដំណើរការផ្តល់ជំនួយ និងសេវាកម្មទាំងនោះ ក្នុងនោះរួមទាំងការអប់រំ ការថែទាំសុខភាព និងការចែកចាយប្រេងឥន្ធនៈ នៅហ្កាហ្សា និងតំបន់វេសបែង នឹងត្រូវរារាំងយ៉ាងធ្ងន់ធ្ងរ ហើយប្រសិនបើមិនអាចធ្វើទៅបានទេនោះ ផលវិបាកនឹងមាន ចំពោះស្ថានភាពមនុស្សធម៌ដែលកំពុងមានសភាពធ្ងន់ធ្ងររួចទៅហើយ និងកំពុងធ្លាក់ចុះយ៉ាងឆាប់រហ័ស ជាពិសេស នៅភាគខាងជើងហ្កាហ្សា»។

អ្នកការទូត «ជំរុញឲ្យរដ្ឋាភិបាលអ៊ីស្រាអែលគោរពតាមកាតព្វកិច្ចអន្តរជាតិរបស់ខ្លួន បន្តរក្សាបុព្វសិទ្ធិ និងអភ័យឯកសិទ្ធិបម្រុងទុករបស់ UNRWA ដោយមិនត្រូវបានប៉ះពាល់ និងបំពេញតាមការទទួលខុសត្រូវរបស់ខ្លួន ដើម្បីជួយសម្រួលដល់ជំនួយមនុស្សធម៌ពេញលេញ រហ័ស សុវត្ថិភាព និងគ្មានការរារាំង ក្នុងគ្រប់ទម្រង់ទាំងអស់ ព្រមទាំងការផ្តល់នូវសេវាមូលដ្ឋានដែលត្រូវការយ៉ាងខ្លាំងដល់ប្រជាជនស៊ីវិល»។

គួរបញ្ជាក់ថា អ៊ីស្រាអែលបានចោទប្រកាន់ថា បុគ្គលិករបស់ UNRWA ច្រើនជាង ១០ភាគរយ នៅតំបន់ហ្កាហ្សាមានទំនាក់ទំនងជាមួយអំពើភេរវកម្ម ហើយថា កន្លែងអប់រំក្រោមការឧបត្ថម្ភរបស់អង្គការនេះ តែងតែញុះញង់ឲ្យមានការស្អប់ខ្ពើមដល់អ៊ីស្រាអែល និងគាំទ្រដល់ការបំភិតបំភ័យ៕