បណ្តាញរបស់រុស្ស៊ី នៅលើកម្មវិធីផ្ញើសារ Telegram បានឲ្យដឹងថា យានដ្រូនរបស់អ៊ុយក្រែន បានវាយប្រហារត្រូវចំរោងចក្រអេតាណុល នៅក្នុងតំបន់ Voronezh ភាគខាងត្បូងរបស់ប្រទេសរុស្ស៊ី ខណៈដែលអភិបាលតំបន់ បាននិយាយថា ការវាយប្រហារនេះបានធ្វើឲ្យមនុស្ស ២នាក់ រងរបួស បង្កជាអគ្គិភ័យ និងការខូចខាតដល់សហគ្រាសឧស្សាហកម្មចំនួន២។

អភិបាលតំបន់លោក Alexander Gusev បានឲ្យដឹងនៅលើកម្មវិធីផ្ញើសារ Telegram ថា ក្រុមអ្នកពន្លត់អគ្គិភ័យបានពន្លត់អណ្ដាតភ្លើងនោះបាន នៅក្នុងសង្កាត់ Anninsky ក្នុងតំបន់ដែលមានកម្មករ ២នាក់រងរបួស។

លោកបានបន្ថែមថា យានដ្រូនរបស់អ៊ុយក្រែនប្រមាណជា ១០គ្រឿង ត្រូវបានបំផ្លាញ ឬស្ទាក់ចាប់ នៅតំបន់នោះ កាលពីល្ងាចថ្ងៃអាទិត្យ (ទី២៧ ខែតុលា) ដោយកម្ទេចកម្ទីរបស់វាបានបណ្ដាលឲ្យអគារជាច្រើនរងការខូចខាត នៅក្នុងតំបន់នោះ ក៏ដូចជាតំបន់ Novokhopersky ផងដែរ។

តែយ៉ាងណាក្ដី ក្រសួងការពារជាតិរុស្ស៊ី បាននិយាយថា មានតែយានដ្រូនអ៊ុយក្រែន ១គ្រឿងប៉ុណ្ណោះដែលត្រូវបានបំផ្លាញ នៅលើតំបន់ Voronezh ក្នុងចំណោមចំនួនសរុបចំនួន ២១គ្រឿង បានធ្លាក់លើដែនដីរបស់ខ្លួនពេញមួយយប់។

បណ្តាញសារព័ត៌មាន Baza នៅលើ Telegram ដែលស្និទ្ធនឹងសេវាកម្មសន្តិសុខរបស់រុស្ស៊ី ក៏ដូចជាបណ្តាញព័ត៌មានផ្សេងទៀតជាច្រើន នៅលើកម្មវិធីនេះ បានឲ្យដឹងថា ការផ្ទុះត្រូវបានគេឮនៅជិតរោងចក្រអេតាណុល នៅក្នុងភូមិ Krasnoye ក្នុងតំបន់ Novokhopersky៕