ដោយដកស្រង់ប្រភពការទូតមួយ ប៉ុស្តិ៍ទូរទស្សន៍ LBC បាននិយាយថា ក្រុមហេសបូឡា បានត្រៀមខ្លួនរួចជាស្រេច ដើម្បីអនុវត្តសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ ដោយរំពឹងថា នឹងមានបទឈប់បាញ់រវាងអ៊ីស្រាអែលនិងលីបង់ ក្នុងករណីដែលឯកសារលីបង់ ត្រូវបានបញ្ចូលទៅក្នុងគំនិតផ្តួចផ្តើមសន្តិភាព នៅតំបន់ហ្កាហ្សាស្ទ្រីប។

យោងតាមប្រភពដដែលបានឲ្យដឹងថា ប្រធានសភាលីបង់ លោក Nabih Berri បានជូនដំណឹងដល់ប្រទេសកាតា និងអេហ្ស៊ីបថា ក្រុមហេសបូឡា បានយល់ព្រម «បែងចែកតំបន់ជួរមុខ» និងអនុវត្តសេចក្តីសម្រេចលេខ១៧០១ របស់ក្រុមប្រឹក្សាសន្តិសុខអង្គការសហប្រជាជាតិក្នុងលក្ខខណ្ឌថា បញ្ហាដោះស្រាយជម្លោះនៅលីបង់ គឺជាផ្នែកមួយនៃគំនិតផ្តួចផ្តើមសន្តិភាពនៃតំបន់ហ្កាហ្សាស្ទ្រីប។ 

ប្រភពនោះ បាននិយាយថា មធ្យោបាយដោះស្រាយការប្រឈមមុខដាក់គ្នារវាងក្រុមហេសបូឡា និងអ៊ីស្រាអែល ត្រូវបានពិភាក្សា នៅទីក្រុងដូហា ជាទីដែលគណៈប្រតិភូមកពីកាតា សហរដ្ឋអាមេរិក និងអ៊ីស្រាអែល បានពិភាក្សាគ្នាអំពីការដោះស្រាយស្ថានការណ៍ នៅក្នុងដែនដីប៉ាឡេស្ទីន កាលពីថ្ងៃអាទិត្យ។ ប្រភពបានបន្តទៀតថា មន្ត្រីអេហ្ស៊ីប និងកាតា ត្រូវបានគេរំពឹងថា នឹងជួបជាមួយក្រុមហាម៉ាស ហើយគណៈប្រតិភូជាន់ខ្ពស់កាតា នឹងធ្វើទស្សនកិច្ច នៅទីក្រុងបេរូត ដើម្បីបញ្ជាក់ពីជំហររបស់ប្រទេសលីបង់។