ក្រសួងការបរទេសរបស់ទីក្រុងសេអ៊ូល នៅថ្ងៃចន្ទ (ទី២៨ ខែរុលា) នេះ បានប្រាប់ឲ្យដឹងថា ប្រទេសកូរ៉េខាងត្បូង និងសហរដ្ឋអាមេរិក នឹងធ្វើកិច្ចពិភាក្សា «ពីរបូកពីរ» រវាងរដ្ឋមន្ត្រីជាន់ខ្ពស់នៃក្រសួងការបរទេស និងការពារជាតិ ក្នុងសប្តាហ៍នេះ ចំពេលមានភាពតានតឹងកាន់តែខ្លាំងឡើងៗ ពាក់ព័ន្ធទៅនឹងការដាក់ពង្រាយទ័ពរបស់កូរ៉េខាងជើង នៅប្រទេសរុស្ស៊ី។

ក្រសួងបានឲ្យដឹងនៅក្នុងសេចក្តីថ្លែងការណ៍មួយថា កិច្ចពិភាក្សានឹងប្រព្រឹត្តទៅនៅទីក្រុងវ៉ាស៊ីនតោន សហរដ្ឋអាមេរិក នាថ្ងៃព្រហស្បតិ៍ (តាមពេលម៉ោងក្នុងស្រុក) រវាងរដ្ឋមន្ត្រីការបរទេស លោក Cho Tae-yul រដ្ឋមន្ត្រីការពារជាតិលោក Kim Yong-hyun រដ្ឋមន្ត្រីការបរទេសអាមេរិកលោក Antony Blinken និងរដ្ឋមន្ត្រីការពារជាតិ លោក Lloyd Austin។

គួរបញ្ជាក់ថា កិច្ចប្រជុំនេះ ធ្វើឡើងចំពេលដែលកូរ៉េខាងជើង ត្រូវបានគេជឿថា បានបញ្ជូនទាហានរបស់ខ្លួន ទៅកាន់ប្រទេសរុស្ស៊ី ដែលអាចជាការដាក់ពង្រាយ ក្នុងសង្គ្រាម នៅអ៊ុយក្រែន។ កូរ៉េខាងត្បូង និងសហរដ្ឋអាមេរិក បានបញ្ជាក់ពីការបញ្ជូនទ័ពរាប់ពាន់នាក់របស់កូរ៉េខាងជើងទៅកាន់ភាគខាងកើតរុស្ស៊ី។

ក្រសួងបានបន្ថែមថា មន្ត្រីជាន់ខ្ពស់ទាំងអស់នោះ នឹងមាន «ការពិភាក្សាទូលំទូលាយ ជុំវិញបញ្ហាឧបទ្វីបកូរ៉េ និងសម្ព័ន្ធភាពទ្វេភាគី ក៏ដូចជាបញ្ហាក្នុងតំបន់ និងពិភពលោកផ្សេងទៀតដែរ»។ ក្រសួងបានបញ្ជាក់ថា ប្រទេសទាំង២ ក៏នឹងអនុម័តសេចក្តីថ្លែងការណ៍រួមមួយ ដោយផ្អែកលើលទ្ធផលនៃកិច្ចពិភាក្សារបស់ពួកគេ៕