ខណៈទើបប្រកាសដាក់ឱ្យដំណើរការប្រើប្រាស់សាកល្បង បញ្ជរសេវា​សាធារណៈ​តាម​ប្រព័ន្ធ​អេឡិច​​ត្រូនិក​ចំនួន ៨គ្រឿង។ ក្រសួងការងារ និងបណ្តុះបណ្តាលវិជ្ជាជីវៈ នៅឆ្នាំ២០២៥ខាងមុខ គ្រោង​នឹងផលិតម៉ាស៊ីននេះប្រមាណជា ១,០០០គ្រឿងថែមទៀត ដើម្បីផ្តល់​ភាព​ងាយ​ស្រួល​ក្នុង​ការ​ផ្តល់​សេវាសាធារណៈនានាជូនដល់ប្រជាពលរដ្ឋ។

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍ឲ្យដឹងថា បញ្ជរ​ផ្តល់សេវាសាធារណៈតាមប្រព័ន្ធអេឡិចត្រូនិកទាំងនេះ បង្កើតឡើងដោយស្នាដៃសិស្ស-និស្សិត​របស់វិស័យអប់រំបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) ដោយ​មាន​មុខ​ងារ​សំខាន់​ៗចំនួន ៦ មានដូចជា៖ ១. សេវាចុះឈ្មោះស្វែងរកការងារ ២. សេវាចុះ​ឈ្មោះ​ស្វែង​រក​បុគ្គលិក​ ៣. សេវាចុះឈ្មោះស្វែងរកការងារក្រៅប្រទេស ៤. សេវាចុះឈ្មោះសិក្សាជំនាញវិជ្ជាជីវៈ ៥. សេវាតាមដានសេវាសាធារណៈរបស់ក្រសួងការងារ និង៦. ផ្តល់ជាព័ត៌មាន ឬដាក់​បណ្តឹង​អនាមិក​មក​កាន់ក្រសួងការងារ ក្នុងករណីមាន​បញ្ហា​ណា​មួយ​ពាក់ព័ន្ធ​ទៅ​នឹង​ការ​ផ្តល់សេ​វា​សាធារណៈ​របស់ក្រសួង ដោយមិនតម្រូវ​ឱ្យបញ្ជាក់​អត្ត​សញ្ញាណ​របស់​អ្នក​ដាក់​ពាក្យ​បណ្តឹង​នោះ​ឡើយ​។

ឯកឧត្តមរដ្ឋមន្រ្តីបញ្ជាក់ថា បើសិនជាតាមរយៈការធ្វើតេស្តសាកល្បងទៅលើម៉ាស៊ីនទាំង ៨បញ្ជរ ទទួល​បានភាពជោគជ័យដោយរលូន ក្រសួងនឹងផលិតម៉ាស៊ីននេះ ប្រមាណជា ១,០០០គ្រឿង សម្រាប់​ដាក់នៅតាមទីតាំងសាធារណៈ ផ្សារទំនើប តំបន់សេដ្ឋកិច្ចពិសេស សាលារៀន ស្ថានីយ​ប្រេង​ឥន្ធនៈ ទីប្រជុំជននានាបន្ថែមទៀត។

កំពុងស្វែង​យល់បញ្ជរផ្តល់សេវាសាធារណៈតាមប្រព័ន្ធអេឡិចត្រូនិកនេះ ក្រុមយុវជនមកពី​តំបន់​ផ្សេង​ៗ​គ្នា បាននិយាយថា ពិតជាសប្បាយរីករាយនៅពេលដែលកូនខ្មែរអាចផលិតម៉ាស៊ីនបាន ជាពិសេស​បានជួយផ្តល់ព័ត៌សំខាន់ៗ ហើយល្អជូនដល់ប្រជាពលរដ្ឋ ដែលកំពុង​មាន​តម្រូវ​ការ​ខ្ពស់​ក្នុង​ការ​ស្វែងរកការងារធ្វើ ដែលរួមមានទាំងនៅក្នុងស្រុក និងក្រៅប្រទេស ពិសេសការ​ផ្តល់​ព័ត៌មាន​ដែល​ត្រឹមត្រូវ ជាក់លាក់ ពីបណ្តាក្រុមហ៊ុនជ្រើសរើសកម្លាំងពលកម្ម។

សូមបញ្ជាក់​ជូនថា បញ្ជរសេវាសាធារណៈតាមប្រព័ន្ធអេឡិចត្រូនិកនេះ ត្រូវបានបង្កើត​ឡើង​ដោយ​មាន​កិច្ច​សហការ រវាងក្រសួងការងារ និងបណ្តុះបណ្តាលវិជ្ជាជីវៈ ជាមួយវិទ្យាស្ថានបច្ចេកទេស (TVET) ជាពិសេសស្របតាមអនុសាសន៍របស់ សម្តេចធិបតី ហ៊ុន ម៉ាណែត នាយករដ្ឋមន្ត្រី​នៃ​កម្ពុជា​ គឺធ្វើយ៉ាងណាត្រូវ​បង្ខិត​ការ​ផ្តល់​សេវា​សាធារណៈ​ឱ្យ​បាន​ខិត​ជិត​មូល​ដ្ឋាន​របស់​ប្រជា​ពលរដ្ឋ និងវិស័យឯកជន៕ អត្ថបទ៖ ឈិត បូរ៉ាវី