នៅព្រឹកថ្ងៃចន្ទ ប្រជាពលរដ្ឋលីបង់នៅក្នុងទីក្រុងបេរូត បានបង្ហាញក្តីកង្វល់ចំពោះការប្រយុទ្ធគ្នាដ៏ខ្លាំងក្លានៅប្រទេសលីបង់រវាងកងកម្លាំងអ៊ីស្រាអែល និងក្រុមហេសបូឡាគាំទ្រដោយអ៊ីរ៉ង់ ដែលបានកើនឡើងខ្លាំងក្នុងរយៈពេលប៉ុន្មានសប្តាហ៍កន្លងមកនេះ ។

កាលពីថ្ងៃអាទិត្យម្សិលមិញ យោធាអ៊ីស្រាអែល បានជំរុញឲ្យអ្នកស្រុករស់នៅក្នុងភូមិចំនួន ១៤ កន្លែង ស្ថិតនៅភាគខាងត្បូងប្រទេសលីបង់ ជម្លៀសខ្លួនចេញជាបន្ទាន់ និងផ្លាស់ទីទៅកាន់តំបន់ភាគខាងជើងច្រាំងទន្លេ Awali ។

ក្រសួងសុខាភិបាលលីបង់ និយាយថា ការវាយប្រហាររបស់អ៊ីស្រាអែលលើទីក្រុងតំបន់ឆ្នេរ Sidon នៅភាគខាងត្បូងប្រទេសលីបង់ បានសម្លាប់មនុស្សយ៉ាងហោច ៩នាក់ និងមនុស្ស ២៥នាក់ផ្សេងទៀត រងរបួសកាលពីថ្ងៃអាទិត្យ ។

ពួកគេបន្តថា កន្លែងផ្សេងទៀតនៅតំបន់ភាគខាងត្បូងលីបង់ ការវាយប្រហារលើទីក្រុង Zawtar al-Sharkiya បានសម្លាប់មនុស្ស ៣នាក់ និងការទម្លាក់គ្រាប់បែកលើទីក្រុង Marjayoun កាលពីថ្ងៃសៅរ៍ បានសម្លាប់មនុស្ស ៥នាក់ ។

មនុស្សសរុប ១៩នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើលីបង់កាលពីថ្ងៃសៅរ៍ ។ មនុស្សយ៉ាងហោច ២.៦៧២នាក់ ត្រូវបានសម្លាប់ និងមនុស្ស ១២.៤៦៨នាក់ បានរងរបួស នៅក្នុងរយៈពេល ១ឆ្នាំកន្លងមកនេះ ចាប់តាំងពីកងកម្លាំងអ៊ីស្រាអែល និងក្រុមជីវពលហេបូឡា បានផ្ទុះអាវុធដាក់គ្នា ។

អ៊ីស្រាអែលនិយាយថា ទហានរបស់ខ្លួន ៤នាក់ ត្រូវបានសម្លាប់នៅតំបន់ភាគខាងត្បូងលីបង់ អំឡុងពេលផ្ទុះអាវុធដាក់គ្នា ។

ក្រុមហាម៉ាស់និយាយថា ពួកគេបានបាញ់មីស៊ីលលើទីតាំងឧស្សាហកម្មយោធា Zevulon ស្ថិតនៅភាគខាងជើងទីក្រុង Haifa របស់អ៊ីស្រាអែល ។ រ៉ុក្កែតរបស់ក្រុមហេសបូឡាំ ត្រូវចំផ្ទះមួយខ្នង និងរថយន្តជាច្រើនគ្រឿង ហើយក្រុមភ្នាក់ងារពន្លត់អគ្គិភ័យ បានឆ្លើយតបដើម្បីពន្លត់ភ្លើង ។

យោងតាមសេវាកម្មរថយន្តគិលានសង្រ្គោះអ៊ីស្រាអែល បានឲ្យដឹងថា ស្រ្តីម្នាក់បានរងរបួសធ្ងន់ ៕