កាលពីថ្ងៃអាទិត្យម្សិលមិញ ក្រុមបាតុករនាំគ្នាដង្ហែក្បួនតាមដងផ្លូវនៅប្រជុំកោះ Canary របស់អេស្ប៉ាញ ដើម្បីប្រឆាំងការធ្វើអន្តោប្រវេសន៍ខុសច្បាប់ ។

យោងតាមតួលេខរដ្ឋាភិបាល បានឲ្យដឹងថា ជនអន្តោប្រវេសន៍ជាង ៣២.០០០នាក់ បានធ្វើដំណើរតាមទូកលើផ្លូវដ៏គ្រោះថ្នាក់ ចេញពីអាហ្វ្រិកខាងលិចឆ្ពោះមកកាន់ប្រជុំកោះ Canary ចន្លោះខែមករា និងថ្ងៃទី ១៥ ខែតុលា ពោលគឺកើនឡើង ៣៩,៧ភាគរយ ពីអំឡុងពេលតែមួយកាលពីឆ្នាំមុន ។

ផ្លូវទឹកក្នុងមហាសមុទ្រអាត្លង់ទិក ឆ្ពោះទៅកាន់ប្រជុំកោះ Canary ត្រូវបានគេមើលឃើញពីកំណើនដ៏ឆាប់រហ័សបំផុសម្រាប់ការធ្វើអន្តោប្រវេសន៍ខុសប្រក្រតី ក្នុងរយៈពេលប៉ុន្មានឆ្នាំចុងក្រោយនេះ បើទោះបីជាចំនួននេះនៅទាបជាងចំនួនជនអន្តោប្រវេសន៍ធ្វើដំណើរឆ្លងកាត់ផ្លូវទឹកនៅភាគកណ្តាលសមុទ្រមេឌីទែរ៉ាណាក៏ដោយ ឆ្ពោះទៅកាន់ប្រទេសអ៊ីតាលី ។

ដូចគ្នានឹងពលរដ្ឋផ្សេងទៀតរបស់អេស្ប៉ាញដែរ អ្នកស្រុកនៅលើប្រជុំកោះ Canary បាននាំគ្នាតវ៉ាផងដែរប្រឆាំងនឹងចំនួនភ្ញៀវទេសចរដ៏លើសលប់ ដែលត្រូវបានគេមើលឃើញថាធ្វើឲ្យប៉ះពាល់អវិជ្ជមានដល់អ្នកស្រុក ៕