បើយោងតាមការស្ទង់មតិថ្មីដែលធ្វើឡើងដោយ SSRS របស់ប្រព័ន្ធផ្សព្វផ្សាយ CNN បានបង្ហាញថា អ្នកបោះឆ្នោតភាគច្រើនគិតថា អតីតប្រធានាធិបតី លោក Donald Trump នឹងមិនព្រមទទួលស្គាល់លទ្ធផលនោះទេ ប្រសិនបើលោកចាញ់ការបោះឆ្នោតប្រធានាធិបតីឆ្នាំ២០២៤ ដោយក្រុមអ្នកគាំទ្ររបស់លោកភាគតិចនិយាយថា បេក្ខជនដែលបរាជ័យ មិនមានកាតព្វកិច្ចត្រូវចុះញ៉មនោះឡើយ។ ហើយប្រសិនបើបញ្ហាប្រឈមផ្លូវច្បាប់ពាក់ព័ន្ធនឹងការបោះឆ្នោត ត្រូវធ្វើនៅតុលាការកំពូលទៀតនោះ អ្នកបោះឆ្នោតភាគច្រើនមានទំនុកចិត្តតិចតួច ឬគ្មានសោះតែម្ដង ដែលថា តុលាការកំពូល នឹងធ្វើការសម្រេចបានយ៉ាងត្រឹមត្រូវ។

ជារួម មានតែ ៣០ភាគរយនៃអ្នកបោះឆ្នោតដែលបានចុះឈ្មោះប៉ុណ្ណោះ គិតថា លោក Trump នឹងទទួលយកលទ្ធផលនៃការបោះឆ្នោតនេះ និងមិនតវ៉ាអ្វីទាំងអស់ ប្រសិនបើលោកចាញ់ ខណៈដែល ៧៣ភាគរយ និយាយថា អនុប្រធានាធិបតី លោកស្រី Kamala Harris នឹងព្រមទទួលយកការបរាជ័យ នៅក្នុងការបោះឆ្នោត។

ចំណែកអ្នកបោះឆ្នោតដែលបានចុះឈ្មោះរួចហើយភាគច្រើន (៥៤ភាគរយ) ជឿថា លោកស្រី Harris នឹងទទួលស្គាល់លទ្ធផល ប្រសិនបើលោកស្រីចាញ់ ហើយថា លោក Trump នឹងមិនព្រមទេ ខណៈពេលដែល ១៨ភាគរយ និយាយថា បេក្ខជនទាំង២ នឹងមិនតវ៉ា តែ ១៥ភាគរយ ថា ពួកគេនឹងមិននៅស្ងៀមទេ ហើយមានតែ ១១ភាគរយប៉ុណ្ណោះ ដែលនិយាយថា លោកស្រី Harris មិនព្រម ប៉ុន្តែលោក Trump នឹងព្រម។

ដោយផ្ដោតទៅលើអ្នកគាំទ្របេក្ខជនម្នាក់ អ្នកគាំទ្រលោកស្រី Harris ជិត ៩៧ភាគរយ រំពឹងថា លោកស្រីនឹងយល់ព្រមទទួលយកលទ្ធផល ប្រសិនបើលោកស្រីចាញ់ ខណៈដែលអ្នកគាំទ្រលោក Trump តិចជាង ៥៧ភាគរយ ជឿថា លោកនឹងទទួលយកការបរាជ័យ ក្នុងការបោះឆ្នោតខាងមុខនេះ៕