មន្ត្រីប្រទេសអ៊ុយក្រែន បាននិយាយថា កងកម្លាំងរុស្ស៊ី បានធ្វើការវាយប្រហារដោយគ្រាប់បែកស៊ីបគោលដៅទៅលើទីក្រុង Kharkiv ជាទីក្រុងធំទីពីររបស់អ៊ុយក្រែន កាលពីថ្ងៃចន្ទ ដោយបានបំផ្លាញយ៉ាងធ្ងន់ធ្ងរដល់អគាររដ្ឋបាល អគារពេទ្យ និងបានធ្វើឱ្យមនុស្សយ៉ាងហោចណាស់១៩នាក់ រងរបួស។

វីដេអូ ដែលបានចេញផ្សាយដោយការិយាល័យរដ្ឋអាជ្ញាប្រចាំតំបន់ទីក្រុង Kharkiv បានបង្ហាញពីការខូចខាតយ៉ាងធំធេងចំពោះអគាររដ្ឋាភិបាលមួយកន្លែង ហើយក្រុមរដ្ឋអាជ្ញាឧក្រិដ្ឋកម្មសង្គ្រាម កំពុងត្រួតពិនិត្យនៅតំបន់នោះ។

អភិបាលក្រុង លោក Oleh Syniehubov បាននិយាយថា ក្រុមបុគ្គលិកសង្គ្រោះបន្ទាន់ កំពុងវាយតម្លៃពីការខូចខាត និងពិនិត្យមើលអ្នកស្លាប់ឬរងរបួស។ លោកនិយាយថា អគាររដ្ឋបាលជាច្រើនជាន់ដែលលោកពុំទាន់បានកំណត់អត្តសញ្ញាណ ត្រូវបានបំផ្លាញ។

ទីក្រុង Kharkiv បានទប់ទល់ទៅនឹងការប៉ុនប៉ងរុលចូលទៅមុខរបស់រុស្សី ទៅកាន់រដ្ឋធានីគីវ នៅដើមដំបូងនៃសង្រ្គាម ហើយចាប់តាំងពីពេលនោះមក បានក្លាយជាគោលដៅញឹកញាប់នៃការវាយលុកតាមអាកាស។

ប្រទេសរុស្ស៊ី បានបដិសេធថា ពុំបានកំណត់គោលដៅលើជនស៊ីវិលក្នុងការវាយលុកពេញលេញរបស់ខ្លួននោះទេ ដែលបានចាប់ផ្តើមនៅក្នុងខែកុម្ភៈ ឆ្នាំ២០២២ ប៉ុន្តែតែងតែវាយលុកទៅលើទីប្រជុំជន និងទីក្រុងនានា នៅពីក្រោយ សមរភូមិមុខ។