​បាល់ទាត់៖ ​ទីក្រុង Catalonia នឹង​អនុញ្ញាតឱ្យ​អ្នកគាំទ្រ​ចូល​ទស្សនា​ពេញ​កីឡដ្ឋាន Nou Camp ១០០% ចាប់ពី​ថ្ងៃ​សុក្រ​សប្តាហ៍​នេះ​តទៅ​។ ​​រយៈពេល​ជាង ១ឆ្នាំ ​រឺ ១៨ខែ​មកហើយ​ដែល​មេរោគ​រាតត្បាត Covid-19 វាយលុក​នៅលើ​ទឹកដី​អេ​ស្ប៉ា​ញ ខណៈ​ចុង​សប្តាហ៍​នេះ Barcelona នឹង​បានឃើញ​រូបភាព​ដែលមាន​អ្នកទស្សនា​ពេញ​កីឡដ្ឋាន​ជិត ១០ម៉ឺន​នាក់​ជា​លើកដំបូង​នៅក្នុង​កីឡដ្ឋាន Nou Camp​។​

​​កន្លងមក Nou Camp បាន​បើក​ឱ្យ​មនុស្ស​ចូល​ទស្សនា​តែ ៦០% ប៉ុណ្ណោះ​នៃ​បរិមាណ​សរុប​។ ​​Barcelona នឹង​ទទួលភ្ញៀវ Valencia ថ្ងៃអាទិត្យ​ចុង​សប្តាហ៍​នេះដែល​កំពុងមាន​ចំណាត់ថ្នាក់​លេខ៩ ក្រោម Barcelona មួយ​ចំណាត់ថ្នាក់​តែមាន​ពិន្ទុ​ស្មើគ្នា​។ ​​បន្ទាប់ពី Valencia, Barcelona ក៏​នឹងត្រូវ​បើក​កីឡដ្ឋាន Nou Camp ម្តងទៀត​ទទួល Dynamo Kyiv នៅ​ក្របខណ្ឌ UEFA Champions League មុន​ពេលដែល​នឹងត្រូវ​ជួប​ជាមួយ​ក្រុម​កំពូល​តារាង La Liga ក្នុងជំនួប El Clasico ដំបូង​ក្នុង​រដូវ​កាល​នេះ​។ ​​សូមបញ្ជាក់ថា ការ​ឈានដល់​ការអនុញ្ញាតឱ្យ​អ្នកគាំទ្រ​ចូល​ទស្សនា​ពេញ​កីឡដ្ឋាន​បែបនេះ បន្ទាប់ពី​ករណី​ឆ្លង​ថ្មី​នៃ​មេរោគ Covid-19 បាន​ធ្លាក់​ចុះ​ក្នុង​អត្រា​ទាប​បំផុត​តាំងពី​ខែកក្កដា​ឆ្នាំមុន​នៅក្នុង​ប្រទេស​អេ​ស្ប៉ា​ញ​៕

​អត្ថបទ​៖​នាង សុភា​វុ​ធ