អ៊ីស្រាអែល បាននិយាយកាលពីថ្ងៃចន្ទថា ខ្លួនបានពិភាក្សាជាមួយក្រុមអ្នកសម្របសម្រួលអន្តរជាតិអំពីចំណុចខំខាន់ៗនៃកិច្ចពិភាក្សាដែលបានស្នើឡើងជាមួយក្រុមហាម៉ាស លើកិច្ចព្រមព្រៀងមួយដើម្បីដោះលែងចំណាប់ថ្នូរអ៊ីស្រាអែលដែលត្រូវបានឃុំខ្លួននៅតំបន់ហ្កាហ្សា ខណៈកងកម្លាំងរបស់ខ្លួន បានបាញ់ផ្លោងទាំងលើទឹកដីលីបង់ និងនៅប៉ាឡេស្ទីន។

ការិយាល័យរបស់នាយករដ្ឋមន្ត្រី លោក Benjamin Netanyahu បាននិយាយថា ប្រធានចារកម្ម លោក David Barnea បានជួបជាមួយមន្ត្រីអាមេរិក និងកាតា នៅទីក្រុងដូហា(Doha) និងបានយល់ព្រមថា ពួកគេនឹងពិភាក្សាជាមួយក្រុមហាម៉ាស អំពីកិច្ចព្រមព្រៀងដើម្បីដោះលែងពលរដ្ឋអ៊ីស្រាអែល ដែលត្រូវបានចាប់ខ្លួនក្នុងការវាយប្រហារកាលពីថ្ងៃទី៧ ខែតុលា ឆ្នាំមុន។

សេចក្តីថ្លែងការណ៍នេះ បានធ្វើឡើងរយៈពេលពីរថ្ងៃបន្ទាប់ពីប្រធានាធិបតីអេហ្ស៊ីប លោក Abdel Fattah al-Sisi បានស្នើបទឈប់បាញ់រយៈពេលពីរថ្ងៃ និងការដោះដូរឈ្លើយសឹកចំណាប់ថ្នូរ ដែលលោកបាននិយាយថា អាចនាំទៅរកបទឈប់បាញ់ ជាអចិន្ត្រៃយ៍។

ការិយាល័យរបស់លោក Netanyahu និយាយថា ក្នុងអំឡុងពេលកិច្ចប្រជុំ ភាគីទាំងអស់បានពិភាក្សាអំពីក្របខ័ណ្ឌបង្រួបបង្រួមថ្មីមួយ ដែលរួមបញ្ចូលគ្នានូវសំណើពីពេលមុនៗ ហើយថែមទាំងបានលើកយកមកពិចារណានូវបញ្ហាសំខាន់ៗ និងការវិវត្តន៍ថ្មីៗនៅក្នុងតំបន់។

នៅប៉ុន្មានថ្ងៃខាងមុខនេះ ការពិភាក្សានឹងបន្តរវាងក្រុមអ្នកសម្របសម្រួល និងក្រុមហាម៉ាស ដើម្បីវាយតម្លៃលទ្ធភាពនៃការចរចា និងកិច្ចខិតខំប្រឹងប្រែងបន្ថែមទៀតដើម្បីជំរុញដល់កិច្ចព្រមព្រៀង។