ប្រជាជនហ្សកហ្ស៊ីរាប់ពាន់នាក់បានប្រមូលផ្តុំគ្នា នៅខាងក្រៅសភា នាទីក្រុងប៊ីលីស៊ី កាលពីយប់ថ្ងៃចន្ទ (ទី២៩ ខែតុលា) ដោយទាមទារឲ្យលុបចោលការបោះឆ្នោតសភា កាលពីចុងសប្តាហ៍កន្លងមក ដែលប្រធានាធិបតីប្រទេសនេះ បានរិះគន់ថា ជាការបោះឆ្នោតដែលមានការក្លែងបន្លំដោយមានជំនួយពីរុស្ស៊ី។

ការប្រមូលផ្តុំគ្នានេះបានធ្វើឲ្យវិបត្តិនយោបាយកាន់តែធ្ងន់ធ្ងរទៅៗ នៅក្នុងប្រទេសនៃតំបន់កូកាសខាងត្បូង (South Caucasus) មួយនេះ ជាកន្លែងដែលគណបក្សកាន់អំណាច Georgian Dream បានងាកទៅរកលទ្ធិផ្តាច់ការកាន់តែខ្លាំងឡើងៗ ហើយលម្អៀងឆ្ពោះទៅរកទីក្រុងមូស្គូ។

លោកស្រីប្រធានាធិបតី Salome Zourabichvili បានប្រាប់ក្រុមបាតុករដែលគ្រវីទង់ជាតិហ្សកហ្ស៊ី និងសហភាពអឺរ៉ុប (EU) ថា៖ «អ្នកទាំងអស់គ្នាមិនបានចាញ់ការបោះឆ្នោតនោះទេ។ ពួកគេបានលួចបន្លំសន្លឹកឆ្នោតរបស់អ្នក ហើយព្យាយាមលួចអនាគតរបស់អ្នកទាំងអស់គ្នា ប៉ុន្តែគ្មាននរណាម្នាក់មានសិទ្ធិធ្វើដូច្នេះបានឡើយ ហើយអ្នកក៏នឹងមិនអនុញ្ញាតឲ្យនរណាម្នាក់ធ្វើដូច្នេះនោះដែរ»។

លោក Giorgi Vashadze មេដឹកនាំនៃសម្ព័ន្ធចលនារួបរួមជាតិ (United National Movement) បាននិយាយថា គណបក្សប្រឆាំងនឹងមិនចូលរួមក្នុងកិច្ចពិភាក្សាណាមួយជាមួយរដ្ឋាភិបាល និងជំរុញឲ្យមានការបោះឆ្នោតថ្មីមួយក្រោមការត្រួតពិនិត្យពីអន្តរជាតិ។

សហភាពអឺរ៉ុប (EU) សហរដ្ឋអាមេរិក និងអង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) បានអំពាវនាវឲ្យមានការស៊ើបអង្កេតពេញលេញ ជុំវិញការអះអាងពីការមានភាពមិនប្រក្រតី នៅក្នុងការបោះឆ្នោតរបស់ហ្សកហ្ស៊ីកាលពីថ្ងៃសៅរ៍ចុងសប្ដាហ៍កន្លងមក។

គណបក្ស Georgian Dream និងគណកម្មាធិការបោះឆ្នោត បានលើកឡើងដូចគ្នាថា ការបោះឆ្នោតនេះ គឺសេរី និងយុត្តិធម៌។ គណៈកម្មាធិការកណ្តាលរៀបចំការបោះឆ្នោត បាននិយាយថា គណបក្ស Georgian Dream ទទួលបានសំឡេង ៥៤,៨ភាគរយនៃសន្លឹកឆ្នោត ដែលស្ទើរតែត្រូវបានរាប់ទាំងអស់ហើយ៕