សហរដ្ឋអាមេរិក បានព្រមានប្រទេសអ៊ីរ៉ង់នៅក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ អំពី «ផលវិបាកធ្ងន់ធ្ងរ» ប្រសិនបើប្រទេសនេះធ្វើសកម្មភាពវាយលុកបន្ថែមទៀតទៅលើអ៊ីស្រាអែល ឬបុគ្គលិករបស់អាមេរិកនៅមជ្ឈិមបូព៌ា។

ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយទៅកាន់ក្រុមប្រឹក្សា ដែលមានសមាជិក១៥រូបថា «យើងនឹងមិនស្ទាក់ស្ទើរក្នុងចំណាត់ការដើម្បីការពារខ្លួននោះទេ សូមកុំច្រឡំ។ សហរដ្ឋអាមេរិក មិនចង់ឃើញការកើនឡើងជម្លោះបន្ថែមទៀតនោះទេ។ យើងជឿថា រឿងនេះនឹងត្រូវបញ្ចប់ការបាញ់តគ្នា រវាងអ៊ីស្រាអែល និងអ៊ីរ៉ង់។

ក្រុមប្រឹក្សាសន្តិសុខ បានជួបប្រជុំគ្នា បន្ទាប់ពីអ៊ីស្រាអែល បានវាយប្រហារលើរោងចក្រមីស៊ីល និងទីតាំងផ្សេងៗទៀតក្នុងប្រទេសអ៊ីរ៉ង់ មុនពេលព្រឹកព្រលឹមកាលពីថ្ងៃសៅរ៍។ វាជាការសងសឹក ចំពោះការវាយប្រហារកាលពីថ្ងៃទី១ ខែតុលា របស់អ៊ីរ៉ង់ទៅលើអ៊ីស្រាអែលដោយមីស៊ីលបាលីស្ទីកប្រមាណ២០០គ្រាប់។

ឯកអគ្គរដ្ឋទូតប្រចាំអង្គការសហប្រជាជាតិរបស់ប្រទេសអ៊ីរ៉ង់ លោក Amir Saied Iravani បានចោទប្រកាន់ទីក្រុងវ៉ាស៊ីនតោនថា កំពុងសមគំនិតតាមរយៈការគាំទ្រផ្នែកយោធា សម្រាប់សម្ព័ន្ធមិត្តរបស់ខ្លួន។ លោក បាននិយាយទៅកាន់ក្រុមប្រឹក្សាថា «ប្រទេសអ៊ីរ៉ង់ បានរក្សាការគាំទ្រផ្នែកការទូតជាប្រចាំ។ ទោះជាយ៉ាងណា ក្នុងនាមជារដ្ឋអធិបតេយ្យមួយ សាធារណៈរដ្ឋអ៊ីរ៉ង់ឥស្លាមនិយម មានសិទ្ធិរបស់ខ្លួនក្នុងការឆ្លើយតបចំពោះសកម្មភាពឈ្លានពាន។

លោក Danny Danon ឯកអគ្គរដ្ឋទូតប្រចាំអង្គការសហប្រជាជាតិរបស់អ៊ីស្រាអែល បានអំពាវនាវឱ្យក្រុមប្រឹក្សាសន្តិសុខដាក់ «ទណ្ឌកម្មធ្វើឲ្យជាប់គាំងធ្ងន់ធ្ងរ» លើហេដ្ឋារចនាសម្ព័ន្ធយោធា និងសេដ្ឋកិច្ចរបស់អ៊ីរ៉ង់ និង «ចាត់វិធានការចាំបាច់ដើម្បីទប់ស្កាត់របបឆ្កួតលីលាកុំឲ្យទទួលបាននូវសមត្ថភាពនុយក្លេអ៊ែរ»។