ទិន្នន័យក្រុមហ៊ុនដឹកជញ្ជូនបានបង្ហាញថា នាវាដឹកប្រេងដែលមានផ្ទុកប្រេងប្រហែល ៤០០.០០០ បារ៉ែល បានចាកចេញពីកំពង់ផែ Pajaritos របស់ប្រទេសម៉ិកស៊ិក ហើយកាលពីថ្ងៃចន្ទកំពុងត្រូវបានដឹកទៅកាន់ប្រទេសគុយបា ជាកន្លែងដែលមានវិបត្តិថាមពលធ្ងន់ធ្ងរ បណ្តាលឲ្យប្រទេសដីកោះមួយនេះ ជួបការលំបាកក្នុងការទប់ទល់ការប្រើប្រាស់ចរន្តអគ្គិសនី។ នាវាដឹកប្រេងដោតទង់ជាតិគុយបា Vilma ត្រូវបានគេរំពឹងថានឹងទៅដល់ប្រទេសកោះនេះ នៅចុងសប្តាហ៍ ។

ឯកអគ្គរដ្ឋទូតគុយបាប្រចាំប្រទេសម៉ិកស៊ិក លោក Marcos Rodriguez បាននិយាយកាលពីថ្ងៃចន្ទថា ប្រទេសគុយបា បានខាតបង់ប្រហែល១៣លានដុល្លារជារៀងរាល់ថ្ងៃ ដោយសារតែការដាក់ទណ្ឌកម្មរបស់សហរដ្ឋអាមេរិក ទៅលើប្រទេសនេះ។

លោក Rodriguez បានបដិសេធមិនធ្វើអត្ថាធិប្បាយលើការដឹកជញ្ជូនប្រេងតាមផែនការពីប្រទេសម៉ិកស៊ិកទៅកាន់ប្រទេសគុយបា នោះទេ ប៉ុន្តែបាននិយាយថា រដ្ឋាភិបាលរបស់លោក កំពុងចរចាជំនួយជាមួយប្រទេសម៉ិកស៊ិក វេណេស៊ុយអេឡា និងប្រទេសកូឡុំប៊ី។

ប្រទេសម៉ិកស៊ិក បានផ្គត់ផ្គង់ប្រេងឆៅ និងប្រេងឥន្ធនៈដល់ប្រទេសគុយបា ចាប់តាំងពីឆ្នាំមុន ដោយបំពេញបន្ថែមបរិមាណដែលបញ្ជូនមកដោយប្រទេសវេណេស៊ុយអេឡា ជាអ្នកផ្គត់ផ្គង់ប្រេងដ៏ធំរបស់ប្រទេសគុយបា។

ទិន្នន័យ LSEG បានបង្ហាញថា ប្រេងកាលពីពេលមុន ត្រូវបានបញ្ជូនកាលពីពាក់កណ្តាលខែកញ្ញា ដោយប្រទេសម៉ិកស៊ិក ទៅកាន់កំពង់ផែដែលបម្រើដល់រោងចក្រចម្រាញ់ប្រេងមួយ របស់ប្រទេសគុយបា។