ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ជាថ្មីម្តងទៀត បានអំពាវនាវរោងចក្រ សហគ្រាសទាំងអស់ ជ្រើសរើសជនមានពិការភាពសម្រាប់បំពេញការងារ ដើម្បីឲ្យពួកគាត់អាចទទួលបានឱកាសការងារ និងមានប្រាក់ចំណូលមួយសមរម្យក្នុងជីវភាពរស់ប្រចាំថ្ងៃ ជាពិសេសចូលរួមអភិវឌ្ឍន៍សង្គម។
ក្នុងព្រឹត្តការណ៍ពិព័រណ៍ការងារ និងផលិតភាពជាតិឆ្នាំ២០២៤ ឯកឧត្តមរដ្ឋមន្រ្តី បានមានប្រសាសន៍បញ្ជាក់ថា ដើម្បីលើកកម្ពស់ដល់ជនមានពិការភាព ក្រសួងការងារ និងបណ្តុះបណ្តាលវិជ្ជាជីវៈ បានប្តេជ្ញាសហការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីអនុវត្តច្បាប់លិខិតបទដ្ឋានគតិយុត្តពាក់ព័ន្ធ ជាមួយនិងការការពារ និងលើកកម្ពស់សិទ្ធិជនដែលមានពិការភាពផងដែរ។ ឯកឧត្តម បានបន្តថា ក្នុងកិច្ចការងារជ្រើសរើសជនមានពិការភាពនេះ ក្រសួងការងារនឹ ងដាក់បញ្ចូលទៅក្នុងបញ្ជី ដើម្បីពិនិត្យមើលថា ក្រុមហ៊ុន សហគ្រាស នៃវិស័យឯកជនទាំងអស់ អាចបំពេញបាន១%យ៉ាងតិច ស្របតាមច្បាប់ក្នុងការតម្រូវឱ្យក្រុមហ៊ុនរោងចក្រសហគ្រាសប្រើប្រាស់កម្លាំងពលកម្មជនមានពិការភាព។
ឯកឧត្តម ហេង សួរ ក៏បានជំរុញឱ្យជនមានពិការភាពអាចសម្លឹងមើលជំនាញវិជ្ជាជីវៈដែលរាជរដ្ឋាភិបាលបានប្រកាសផ្តល់ជូនប្រជាពលរដ្ឋមកពីគ្រួសារក្រីក្រ និងងាយរងហានិភ័យ ដែលស្របតាមលទ្ធភាពក្នុងការពង្រឹងសមត្ថភាពចំណេះជំនាញរបស់ខ្លួន។ ជាមួយនេះ ឯកឧត្តម បានលើកទឹកចិត្តដល់ជនមានពិការភាពទាំងអស់ មិនត្រូវអស់សង្ឃឹម ហើយត្រូវតស៊ូជំនះរាល់ការលំបាកនានា ដើម្បីចូលរួមជាមួយរាជរដ្ឋាភិបាលក្នុងការកសាងសង្គមជាតិឱ្យកាន់តែរីកចម្រើន ។
កញ្ញា ពៅ សុផានី ជាជនពិការភាព បច្ចុប្បន្នមានអាជីពផ្នែកនិពន្ធវីដេអូឯករាជ្យ (Freelancer) បានសម្ដែងការពេញចិត្ត និងគាំទ្រចំពោះការគិតគូររបស់រាជរដ្ឋាភិបាល ក៏ដូចជាក្រសួងការងារ ដែលយកចិត្ដទុកដាក់ចំពោះជនមានពិការភាព និងជំរុញឱ្យវិស័យឯកជនទទួល និងផ្ដល់ឱកាសការងារជូនជនមានពិការភាពអាចបំពេញការងារបាន។ កញ្ញានិយាយទៀតថា ការផ្ដល់ឱកាសការងារដល់ជនមានពិការភាពនេះ ដើម្បីទទួលបានការងារ និងមានប្រាក់ចំណូលក្នុងការផ្គត់ផ្គង់ជីវភាពរស់ប្រចាំថ្ងៃ។
លោក ម៉ុក ក្រឹម សព្វថ្ងៃប្រកបរបររត់កង់បី បានអំពាវនាវដល់ក្រុមហ៊ុន សហគ្រាសទាំងអស់ សូមផ្ដល់ឱកាសការងារជូនជនមានពិការភាពឱ្យបានច្រើន ខណៈដែលជនមានពិការភាព ក៏អាចបំពេញការងារបានដូចគ្នាជាមួយនឹងជនមានកាយសម្បទារគ្រប់គ្រាន់ផងដែរ។
បច្ចុប្បន្នជនពិការភាពដែលកំពុងបម្រើការងារនៅតាមស្ថាប័នរដ្ឋ និងឯកជនមានចំនួនប្រមាណជាង ៧ពាន់នាក់។ រាជរដ្ឋាភិបាល បានជំរុញឱ្យបង្កើនការធ្វើវិយោគទុនលើជនមានពិការភាព និងបន្តកសាងធនធានជនមានពិការភាពបន្ថែមទៀត រាប់ទាំងការគិតគូរកម្មវិធីសិក្សា ប្រកបដោយនវានុវត្តន៍ និងរស់រវើក ដើម្បីធានាថាជនមានពិការភាពអាចរស់នៅក្នុងសង្គមកម្ពុជា ដោយសមធម៌ មានឱកាសប្រកួតប្រជែងទាំងនៅក្នុងប្រទេស តំបន់ និងសកលលោក៕ អត្ថបទ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
