​ចិន៖ ​ព្រឹត្តិការណ៍​កីឡា​ជា​លក្ខណៈ​អន្តរជាតិ​មួយ​ត្រូវ​បាន​រៀបចំឡើង​នៅ​ក្នុង​ប្រទេស​ចិន​ជា​លើក​ដំបូង ចាប់​តាំង​ពី​ការ​ផ្ទុះ​ឡើង​នៃ​មេរោគ​រាតត្បាត​ជាស​កល Covid-19​។ ​ការប្រកួត​កីឡា​សម្តែង​ស្គី​លើ​ផ្ទាំង​ទឹកកក Asia Open Trophy ត្រូវ​រៀបចំឡើង​នៅ​កីឡដ្ឋាន​ទើប​កែ​លម្អ​ថ្មី Capital Indoor Stadium ចន្លោះ​ថ្ងៃ​ទី​១៣ ដល់ ១៦ ខែ​តុលា​នេះ​។

​​ជាមួយគ្នា​នោះ​ដែរនេះ​ក៏​ជា​ព្រឹត្តិការណ៍​សាកល្បង​មួយទៀត​របស់​ចិន មុន​រៀបចំ​ព្រឹត្តិការណ៍​កីឡា​អូឡាំពិក​រដូវរងា​ឆ្នាំក្រោយ​។ ​វិធានការ​តឹងរ៉ឹង​លើ​ផ្នែក​សុខាភិបាល​ត្រូវ​បាន​ណែនាំ​ឡើង​នៅ​ក្នុង​ព្រឹត្តិការណ៍​នេះ ពោល​គឺ​អត្ត​ព​លិ​ក​ដែល​ចូលរួម​ទាំងអស់​តម្រូវ​ឱ្យ​ចាក់​វ៉ាក់សាំង​គ្រប់​ចំនួន​ដូ​ស ១៤ថ្ងៃមុន​មកដល់​ទឹកដី​ចិន​។ ​ភាគី​ដែល​ចូលរួម​មិន​ថា ​អត្ត​ព​លិ​ក រឺ​ប្រតិភូ​មិន​អាច​ចាក​ចេញពី​សណ្ឋាគារ​ដែល​ខ្លួន​ស្នាក់នៅ​បាន​ឡើយ ក្រៅពី​ការ​ចាក​ចេញ​ទៅ​ហ្វឹកហាត់ និង​ប្រកួត​ទៅតាម​កាលវិភាគ និង​ទីតាំង​ដែល​បាន​កំណត់​ជាក់លាក់​។ ​ចំណែក​ក្រុម​អ្នក​ផ្សព្វផ្សាយ​សារព័ត៌មាន​ត្រូវ​ធ្វើ​តេស្ត​ជាប្រចាំ​រាល់ ២៤​ម៉ោង​ម្តង​។

​​ម្ចាស់​មេដាយ​ប្រាក់​ចិន Han Cong និង Sui Wenjing រួម​ជាមួយ​អត្ត​ព​លិ​ក​ជប៉ុន Yuma Kagiyama, Mai Mihara និង Kaori Sakamoto ក៏ដូចជា​អត្ត​ពលិក​ម​ក​ពី​ឡេ​តូ​នី Deniss Vasiljevs ក៏បាន​ចូលរួម​ការប្រកួត​នៅ​រដ្ឋធានី​ប៉េកាំង​នេះ​ផង​ដែរ តែ​អត្ត​ព​លិ​ក​ក្តី​រំពឹង​មេដាយ​មាស​របស់​ជប៉ុន​ម្នាក់​គឺ Rika Kihira បាន​ប្រកាស​ដក​ខ្លួន​មិន​ចូលរួម​កាលពី​ដើមខែ​។​ ​សូម​បញ្ជាក់​ថា ​កីឡដ្ឋាន Capital Indoor នេះ​ត្រូវ​បាន​សាង​សង់​ឡើង​តាំងពី​ឆ្នាំ​១៩៦៨ និង​ធ្លាប់​ទទួល​ការប្រកួត​វិញ្ញាសា​កីឡាបាល់ទះ​កាលពី​អូឡាំពិក ២០០៨ នៅ​ទីក្រុង​ប៉េកាំង​នេះ​៕

​អត្ថបទ​៖​នាង សុភា​វុ​ធ