មន្ត្រីក្នុងតំបន់ បានប្រាប់សារព័ត៌មាន AFP កាលពីថ្ងៃចន្ទថា លំហូរនៃគ្រួសារជនភៀសខ្លួនដែលឆ្លងពីប្រទេសលីបង់ ចូលទៅប្រទេសស៊ីរី តាមរយៈផ្លូវឆ្លងកាត់បន្ទាប់បន្សំ បានថយចុះមកនៅកម្រិតទាប បន្ទាប់ពីការវាយប្រហាររបស់អ៊ីស្រាអែលនៅទីនោះ កាលពីសប្តាហ៍មុន។

ច្រកឆ្លងកាត់ដីគោកនៅព្រំដែនភាគឦសាននៃប្រទេសលីបង់ដែលគេស្គាល់ថា Jousieh នៅខាងស៊ីរី ភ្ជាប់ទៅទីក្រុង Qusayr ក្នុងខេត្ត Homs របស់ប្រទេសស៊ីរី។

ច្រកឆ្លងកាត់ ត្រូវបានបិទមិនឲ្យធ្វើដំណើរ កាលពីថ្ងៃសុក្រសប្តាហ៍មុន នៅពេលដែលការវាយប្រហាររបស់អ៊ីស្រាអែល បានធ្វើឲ្យក្លាយជារណ្ដៅដ៏ធំមួយ ដែលរារាំងដល់ចរាចរណ៍យានជំនិះ។

ការវាយឆ្មក់នោះ បានកើតឡើង បន្ទាប់ពីព្រំដែនដីគោកដ៏សំខាន់ជាមួយស៊ីរី ដែលគេស្គាល់ថា Masnaa នៅខាងលីបង់ និងដែលស្ថិតនៅចន្លោះទីក្រុងបេរូត និងទីក្រុងដាម៉ាស ត្រូវបានបង្ខំឲ្យបិទ ដោយការវាយប្រហាររបស់អ៊ីស្រាអែល កាលពីថ្ងៃទី ០៤ ខែតុលា ឆ្នាំ ២០២៤។

ការវាយប្រហារ បានរារាំងយ៉ាងខ្លាំងដល់សមត្ថភាពរបស់មនុស្សក្នុងការភៀសខ្លួនចេញពីប្រទេសលីបង់តាមផ្លូវគោក នៅពេលដែលក្រុមហ៊ុនអាកាសចរណ៍ទាំងអស់ លើកលែងតែក្រុមហ៊ុនអាកាសចរណ៍ជាតិបានផ្អាកជើងហោះហើរ។

លោក Dabbah Al-Mashaal មន្ត្រីស៊ីរីដែលមើលការខុសត្រូវលើផ្លូវឆ្លងកាត់ បាននិយាយថា៖«ការធ្វើដំណើររបស់ជនភៀសខ្លួន បានធ្លាក់ចុះ ៩០ភាគរយ ចាប់តាំងពីច្រកឆ្លងកាត់ (Jousieh)នេះ ត្រូវបានកំណត់គោលដៅ»។