អ្នកនាំពាក្យក្រសួងការបរទេសអាមេរិក លោក Matthew Miller បានថ្លែងនៅក្នុងសន្និសីទសារព័ត៌មានមួយថា ក្រសួងការបរទេសអាមេរិក ជឿជាក់ថា ការវាយប្រហាររបស់អ៊ីស្រាអែលលើអ៊ីរ៉ង់ គឺសមាមាត្រទៅនឹងការវាយប្រហារដែលធ្វើឡើងដោយទីក្រុងតេអេរ៉ង់ កាលពីថ្ងៃទី ០១ ខែតុលានេះ។

លោកបាននិយាយថា៖«ដូចដែលអ្នកបានដឹងហើយថា ដោយសារតែយើង បាននិយាយអំពីការវាយប្រហារ ជាសាធារណៈ យើងកំពុងទាក់ទងជាមួយពួកគេ (ជនជាតិអ៊ីស្រាអែល) អស់រយៈពេលជិត ៤ សប្តាហ៍អំពីលក្ខណៈនៃការឆ្លើយតបរបស់ពួកគេ ហើយត្រូវប្រាកដថា ការឆ្លើយតបរបស់ពួកគេ គួរតែជាអ្វីដែលសមាមាត្រ ហើយមិនមែនក្នុងមធ្យោបាយណាមួយនាំឲ្យមានការកើនឡើងភាពតានតឹងបន្ថែមទៀតទេ។ យើងជឿថា នោះជាលក្ខណៈនៃការឆ្លើយតប ហើយអ៊ីរ៉ង់ មិនគួរឆ្លើយតបតាមវិធីណាមួយឡើយ»។

លោក Miller បានចង្អុលបង្ហាញថា៖«ប្រសិនបើអ៊ីរ៉ង់ឆ្លើយតបតាមមធ្យោបាយណាមួយ យើងនឹងបន្តការពារអ៊ីស្រាអែល»។ លោកបានបន្ថែមថា ការឆ្លើយតបរបស់អ៊ីស្រាអែល មិនរាប់បញ្ចូលការវាយប្រហារលើគោលដៅនុយក្លេអ៊ែរ ឬសេដ្ឋកិច្ចនោះទេ។ អ្នកការទូតរូបនេះ បានសង្កត់ធ្ងន់ថា៖«ការឆ្លើយតបពីអ៊ីស្រាអែលត្រូវបានកំណត់ចំពោះទីតាំងយោធា ដែលសមស្របទាំងស្រុងចំពោះលក្ខណៈនៃការវាយប្រហារដោយអ៊ីរ៉ង់»។