ប្រធានាធិបតីចិន លោក Xi Jinping (ស៊ី ជីនពីង) កាលពីឆ្នាំមុន បានស្នើសុំឲ្យប្រធានាធិបតីអាមេរិក លោក Joe Biden ផ្លាស់ប្តូរភាសាដែលសហរដ្ឋអាមេរិកប្រើនៅពេលពិភាក្សាអំពីជំហររបស់ខ្លួន ស្តីពីឯករាជ្យភាពរបស់កោះតៃវ៉ាន់។ នេះបើយោងតាមសម្ដីរបស់មន្ត្រីអាមេរិក ២រូបដែលដឹងពីការសន្ទនាលក្ខណៈឯកជននេះ។

ក្នុងអំឡុងកិច្ចប្រជុំរវាងលោក Biden និងលោក ស៊ី កាលពីខែវិច្ឆិកាឆ្នាំមុន នៅក្បែរទីក្រុង San Francisco លោក ស៊ី និងជំនួយការរបស់លោកបានស្នើឲ្យ លោក Biden និងក្រុមរបស់លោកកែតម្រូវភាសា នៅក្នុងសេចក្តីថ្លែងការណ៍ផ្លូវការរបស់សហរដ្ឋអាមេរិក។

ប្រទេសចិនចង់ឲ្យសហរដ្ឋអាមេរិកនិយាយថា «យើងប្រឆាំងនឹងឯករាជ្យភាពរបស់កោះតៃវ៉ាន់» ជាជាងភាសាបច្ចុប្បន្នដែលថា សហរដ្ឋអាមេរិក «មិនគាំទ្រ» ឯករាជ្យ សម្រាប់កោះតៃវ៉ាន់ឡើយ។ នេះជាការលើកឡើងរបស់បុគ្គល ដែលបានសុំលាក់អត្តសញ្ញាណ នៅពេលនិយាយអំពីការផ្លាស់ប្តូរការទូតឯកជនដែលពួកគេបានចូលរួម ឬទទួលបានព័ត៌មាននេះ។

ហើយបើយោងតាមមន្ត្រីអាមេរិក ២រូប និងមនុស្សម្នាក់ទៀតដែលដឹងពីការផ្លាស់ប្តូរនេះ បានឲ្យដឹងថា ជំនួយការរបស់លោក ស៊ី បានតាមមើលម្តងហើយម្តងទៀត និងធ្វើការស្នើសុំ ក្នុងរយៈពេលជាច្រើនខែ ចាប់តាំងពីពេលនោះមក។ តែសហរដ្ឋអាមេរិកបានបដិសេធមិនផ្លាស់ប្តូរឡើយ។

សេតវិមាន បានឆ្លើយតបទៅនឹងសំណើសុំការអត្ថាធិប្បាយជាមួយនឹងសេចក្តីថ្លែងការណ៍ ដែលនិយាយឡើងវិញនូវគោលនយបាយ ដែលថា ទីក្រុងវ៉ាស៊ីនតោនមិនគាំទ្រឯករាជ្យភាពរបស់កោះតៃវ៉ាន់ឡើយ។ សេចក្តីថ្លែងការណ៍បានរៀបរាប់ថា៖ «រដ្ឋបាល Biden-Harris មានភាពស្របគ្នាទៅនឹងគោលនយោបាយចិនតែមួយរបស់យើងជាយូរមកហើយ»។

ចំណែកក្រសួងការបរទេសចិនវិញ បានប្រាប់ថា៖ «អ្នកគួរតែដាក់សំណួរនេះទៅកាន់រដ្ឋាភិបាលសហរដ្ឋអាមេរិក។ ជំហររបស់ចិនលើបញ្ហាកោះតៃវ៉ាន់ គឺច្បាស់លាស់ និងមិនប្រែប្រួលឡើយ»។ រីឯស្ថាប័នការបរទេសរបស់កោះតៃវ៉ាន់បានបដិសេធមិនធ្វើការអត្ថាធិប្បាយអ្វីឡើយ៕