នគរបាលឥណ្ឌាបានឃុំខ្លួនមនុស្ស ២នាក់ នៅថ្ងៃអង្គារ (ទី២៩ ខែតុលា) នេះ បន្ទាប់ពីមានការដុតកាំជ្រួច នៅវិហារមួយ បានបង្កជាផ្ទុះឆេះដ៏ធ្ងន់ធ្ងរ ដែលបណ្តាលឲ្យមនុស្សជិត ១០០នាក់ ចូលមន្ទីរពេទ្យ ហើយ ៨នាក់ ស្ថិតក្នុងស្ថានភាពធ្ងន់ធ្ងរ។

សារព័ត៌មានឥណ្ឌា បានរាយការណ៍ថា មនុស្សរាប់រយនាក់ បានប្រមូលផ្តុំគ្នា ជុំវិញវិហារសាសនាហិណ្ឌូ ក្នុងទីក្រុង Nileshwaram នៅភាគខាងត្បូងរដ្ឋ Kerala កាលពីល្ងាចថ្ងៃចន្ទ (ទី២៨ ខែតុលា) ដើម្បីមើលកាំជ្រួច។ បន្ទាប់មក ពីខាងក្នុងអគារមួយ សំឡេងផ្ទុះរប៉េះរប៉ោះអាចត្រូវបានគេឮ មុនពេលដែលសំណុំនៃអណ្ដាតភ្លើងដ៏ធំមួយ បានផ្ទុះហោះឡើងបាញ់ទៅលើមេឃ។

ស្នងការនគរបាល ក្នុងតំបន់ លោកស្រី Shilpa Dyavaiah បានប្រាប់សារព័ត៌មាន AFP ថា៖ «មនុស្សប្រហែល ៨នាក់ គឺស្ថិតក្នុងស្ថានភាពធ្ងន់ធ្ងរ ហើយប្រមាណជា ១៥៤នាក់ ត្រូវបានរាយការណ៍ថា បានរងរបួស ដោយក្នុងចំណោមនោះ ៩៧នាក់ ត្រូវបានបញ្ជូនទៅមន្ទីរពេទ្យ»។ អមដោយការបន្ថែមថា ហេតុការណ៍នោះបណ្ដាលមកពីការដុតផាវនៅកៀកនឹងកន្លែងទុកឧបករណ៍មានសារធាតុរំសេវទាំងនោះ អ្នកស្រី Dyavaiah បានប្រាប់ថា៖ «ពួកគេបានដុតផាវនៅជិតកន្លែងដែលពួកគេបានទុកគ្រឿងផ្ទុះកម្សាន្តទាំងនោះ»។

សារព័ត៌មានឥណ្ឌារាយការណ៍ដោយដកស្រង់សម្តីមន្ត្រី ដែលបាននិយាយថា អគ្គិភ័យបណ្តាលឲ្យរលាកមុខ និងដៃរបស់អ្នក ដែលស្ថិតនៅក្នុងចំណោមមនុស្សដ៏ណែនណាន់តាន់តាប់។ មន្ត្រីរដ្ឋបាលមូលដ្ឋាន លោក K. Inbasekhar បាននិយាយថា គ្មានការអនុញ្ញាតណាមួយឲ្យមានកម្មវិធីដុតកាំជ្រួចនេះនោះទេ៕