ក្រុមប្រដាប់អាវុធហេសបូឡា នៅប្រទេសលីបង់ នាថ្ងៃអង្គារ (ទី២៩ ខែតុលា) បានប្រាប់ឲ្យដឹងថា ខ្លួនបានបោះឆ្នោតជ្រើសរើសប្រមុខរង លោក Naim Qassem ឲ្យស្នងតំណែងជាអគ្គលេខាធិការជំនួសសពលោក Hassan Nasrallah ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលលើតំបន់ជាយក្រុងភាគខាងត្បូងនៃទីក្រុងបេរូត កាលពីជាង ១ខែមុន។

ក្រុមនេះបានឲ្យដឹងនៅក្នុងសេចក្តីថ្លែងការណ៍ជាលាយលក្ខណ៍អក្សរថា ក្រុមប្រឹក្សាស៊ូរ៉ា (Shura Council) របស់ខ្លួន បានសម្រេចជ្រើសរើសលោក Qassem វ័យ ៧១ឆ្នាំ ស្របតាមយន្តការដែលបានបង្កើតឡើង សម្រាប់ការជ្រើសរើសអគ្គលេខាធិការរបស់ក្រុម។

រូបលោកត្រូវបានតែងតាំងជាប្រមុខរងរបស់ក្រុមហេសបូឡា ក្នុងឆ្នាំ១៩៩១ ដោយអគ្គលេខាធិការរបស់ក្រុមប្រដាប់អាវុធ នាពេលនោះ គឺលោក Abbas al-Musawi ដែលបានបាត់បង់ជីវិតដោយសារការវាយប្រហារពីឧទ្ធម្ភាគចក្ររបស់អ៊ីស្រាអែល នៅឆ្នាំបន្ទាប់មក។

លោក Qassem នៅតែបំពេញតួនាទីរបស់លោកដដែល នៅពេលដែលលោក Nasrallah ក្លាយជាប្រមុខដឹកនាំ ហើយធ្វើជាអ្នកនាំពាក្យឈានមុខគេរបស់ក្រុមហេសបូឡាជាយូរមកហើយ ដោយបានធ្វើបទសម្ភាសន៍ជាមួយប្រព័ន្ធផ្សព្វផ្សាយបរទេស ក្នុងនោះរួមទាំងការផ្ដល់ព័ត៌មានពីអរិភាពឆ្លងព្រំដែនជាមួយអ៊ីស្រាអែល ដែលបានបន្តមានកាន់តែធ្ងន់ធ្ងរឡើងៗ កាលពីឆ្នាំមុន។

គួរបញ្ជាក់ថា លោក Nasrallah ត្រូវបានសម្លាប់នៅថ្ងៃទី២៧ ខែកញ្ញា ហើយឥស្សរជនជាន់ខ្ពស់របស់ក្រុមហេសបូឡា លោក Hashem Safieddine ដែលចាត់ទុកថា ជាអ្នកអាចស្នងតំណែងខ្ពស់ជាងគេបំផុតនោះ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលមួយសប្តាហ៍ក្រោយមក៕