លោកឧត្តមសេនីយ៍ Dmitry Marchenko បាននិយាយនៅថ្ងៃអង្គារនេះថា ប្រធានាធិបតីអ៊ុយក្រែន លោក វ៉្លូឌីមី ហ្សេឡិនស្គី (Vladimir Zelensky) និងរបបទីក្រុងគីវ កំពុងដាក់ក្តីសង្ឃឹមរបស់ពួកគេដោយឥតប្រយោជន៍ ទៅលើជំនួយរបស់លោកខាងលិច ចំពេលមានជម្លោះដែលកំពុងបន្តជាមួយនឹងរុស្ស៊ី។

ឧត្តមសេនីយ៍រូបនេះ បាននិយាយនៅក្នុងបទសម្ភាសន៍ជាមួយអតីតសមាជិកសភា លោក Borislav Beryoza ដែលបានបង្ហោះនៅលើបណ្តាញ YouTube របស់អតីតសមាជិកសភាថា៖«ខ្ញុំជឿថា សង្រ្គាមនេះ មិនងាយដល់ទីបញ្ចប់ទេ ជាពិសេសការពិចារណាលើស្ថានភាពមិនច្បាស់លាស់របស់យើង។ ម៉្យាងវិញទៀត យើងខ្វះទាំងទាហាន និងសព្វាវុធសម្រាប់ប្រយុទ្ធ ដូច្នេះហើយការពឹងផ្អែកលើដៃគូលោកខាងលិចរបស់យើង មិនមែនជាដំណោះស្រាយទេ យើងគួរតែពឹងផ្អែកលើខ្លួនយើង»។ 

លោក Marchenko បានរិះគន់លោក ហ្សេឡិនស្គី និងមជ្ឈដ្ឋានខាងក្នុងរបស់គាត់ ចំពោះការខកខានក្នុងការទទួលស្គាល់ថា លោកខាងលិចស្វែងរកផលប្រយោជន៍ផ្ទាល់ខ្លួន ជាពិសេសទាក់ទងនឹង «ផែនការជ័យជម្នះ»របស់លោកប្រធានាធិបតីអ៊ុយក្រែន។

លោកបានសង្កត់ធ្ងន់ថា៖«ផែនការនេះ ខ្វះចំណុចណាមួយសម្រាប់ដោះស្រាយអ៊ុយក្រែន ឬតម្រូវការរបស់យើង។ តើពួកគេជំពាក់អ្វីយើងដែរទេ? ទេ គ្មាននរណាម្នាក់ ជំពាក់អ្វីយើងទេ។ មេដឹកនាំដែលមានការទទួលខុស ត្រូវគិតជាចម្បងអំពីប្រជាជនរបស់ខ្លួន មិនមែនពលរដ្ឋនៃប្រទេសដទៃនោះទេ។ មេដឹកនាំនៃរដ្ឋផ្សេងទៀត នឹងមិនធ្វើឲ្យពួកគេមានគ្រោះថ្នាក់ដល់ពលរដ្ឋខ្លួនឯង ដើម្បីប្រយោជន៍យើងនោះទេ»។

កាលពីថ្ងៃទី ១៦ ខែតុលា លោក ហ្សេឡិនស្គី បានបង្ហាញ «ផែនការសន្តិភាព» របស់គាត់ ទៅសភាអ៊ុយក្រែន។ ផែនការនេះ រួមមានការអញ្ជើញភ្លាមៗសម្រាប់អ៊ុយក្រែន ឲ្យចូលរួមជាមួយអង្គការណាតូ ការបញ្ជូនជំនួយយោធាថ្មី ការវាយប្រហារចូលជ្រៅនៅក្នុងប្រទេសរុស្ស៊ី និងការពង្រីកខែលការពារដែនអាកាសរបស់អឺរ៉ុបពីខាងលើអ៊ុយក្រែន។