​បាល់ទាត់៖ ​ក្លិប​បាល់ទាត់​ប្រេ​ស៊ី​ល Sao Paulo បានសំរេច​បញ្ចប់​តំណែង​គ្រូបង្វឹក​សញ្ជាតិ​អា​ហ្ស​ង់​ទីន​លោក Hernan Crespo ចេញពី​តំណែង​ហើយ​ក្រោយ​ដឹកនាំ​ក្រុម​បាន​ត្រឹម ៨ខែ​។ ​អតីត​ខ្សែប្រយុទ្ធ Chelsea រូបនេះបានមក​កាន់តំណែង​នៅ Sao Paulo កាលពី​ខែកុម្ភៈ បន្ទាប់ពី​ចាកចេញ​ពី​ក្លិប​​អា​ហ្ស​ង់​ទីន Defensa y Justicia ដែល​លោក​ដឹកនាំ​ឈ្នះ​ជើងឯក Copa Sudamericana គួរឱ្យភ្ញាក់ផ្អើល​។

​​កិច្ចសន្យា​របស់លោក Crespo ត្រូវអស​ឮ​សុពលភាព​នៅ​ដំណាច់ឆ្នាំ២០២២ នេះ តែ​ក្លិប​បានសំរេច​ចែកផ្លូវ​គ្នា​ជាមួយ​គ្រូបង្វឹក​វ័យ ៤៦ឆ្នាំ​រូបនេះ​ក្រោយ Sao Paulo មាន​រដូវ​កាល​ដ៏​អាក្រក់​មួយ​នៅក្នុង​ក្របខណ្ឌ​លី​គ​កំពូល​ប្រេ​ស៊ី​ល ​ដែល​ពួកគេ​កំពុង​ឈរ​លេខ១៣ មាន​ត្រឹម ៣០ពិន្ទុ​ប៉ុណ្ណោះ​ពី​ការប្រកួត ២៥លើក​ ខណៈ​ក្រុម​នាំមុខគេ​គឺ Atletico Mineiro មាន ៥៤ពិន្ទុ​ពី​ការប្រកួត ២៤លើក​។ ​​យ៉ាងណាក្តី​មុន​ការចាកចេញ​នេះ​លោក Hernan Crespo ក៏បាន​ដឹកនាំ​ក្រុម​ឈ្នះ​ពាន Sao Paulo State League ដែលជា​ពាន​ដំបូង​ក្នុង​រយៈពេល ៩ឆ្នាំ​របស់ Sao Paulo​។​ ​​បន្ទាប់ពី​មាន​អាជីព​ជោគជ័យ​ពេល​ជា​កីឡាករ Hernan Crespo បានចាប់ផ្តើម​អាជីព​ដឹកនាំ​កាលពី​ឆ្នាំ២០១៥ នៅ​ទឹកដី​អ៊ីតាលី​ដឹកនាំ​ក្រុម Modena មុនពេល​ផ្លាស់​មក​ដឹកនាំ Banfield នៅ​អា​ហ្ស​ង់​ទីន​ឆ្នាំ២០១៨ និង Defensa u Justicia នៅ​ឆ្នាំ២០២០៕

​អត្ថបទ​៖​នាង សុភា​វុ​ធ