សេវាសន្តិសុខសហព័ន្ធ (FSB) នៅថ្ងៃអង្គារ (ទី២៩ ខែតុលា) នេះ បាននិយាយថា តុលាការរុស្ស៊ី បានកាត់ទោសអ្នកឯកទេសផ្នែកបច្ចេកវិទ្យាព័ត៌មានវិទ្យាឲ្យជាប់ពន្ធនាគាររយៈពេល ១៣ឆ្នាំកន្លះ ពីបទក្បត់ជាតិ ពាក់ព័ន្ធទៅនឹងការព្យាយាមបញ្ចូនព័ត៌មានសម្ងាត់ដល់ទីភ្នាក់ងារស៊ើបការណ៍សម្ងាត់កណ្តាល (CIA) របស់សហរដ្ឋអាមេរិក។

ប្រព័ន្ធផ្សព្វផ្សាយរបស់ប្រទេសរុស្ស៊ី បានរាយការណ៍ថា បុរសនោះឈ្មោះ Firuz Dadoboev មានសញ្ជាតិពីរ គឺរុស្ស៊ី និងអាមេរិក។ FSB ដែលជាស្ថាប័នបន្តពី KGB សម័យសូវៀត បានឲ្យដឹងថា ជនល្មើស Dadoboev បានព្យាយាមបញ្ជូនព័ត៌មានសម្ងាត់រដ្ឋដែលរកបានដោយខុសច្បាប់ទៅឲ្យតំណាង CIA។ វីដេអូដែលត្រូវបានផ្សព្វផ្សាយដោយប្រព័ន្ធផ្សព្វផ្សាយរុស្ស៊ី បង្ហាញថា រូបគេត្រូវបានឃុំខ្លួននៅក្បែរតំបន់ព្រៃ កាលពីខែតុលា ឆ្នាំ២០២២។

FSB បានបញ្ជាក់ថា អ្នកទោសបានសារភាពទទួលទោស។ តែយ៉ាងណាក្ដី មិនមានការផ្ដល់លម្អិតបន្ថែមអំពីព័ត៌មានអ្វីដែលត្រូវបានចោទប្រកាន់ថា រួបគេបានព្យាយាមបញ្ជូនទៅឲ្យ CIA នោះ។ CIA មិនបានធ្វើអត្ថាធិប្បាយភ្លាមៗនោះឡើយ ពាក់ព័ន្ធនឹងករនីនេះ។ ចំណែកលោក Dadoboev មិនអាចទាក់ទងបាននោះទេ៕