នៅថ្ងៃអង្គារនេះ ជនភៀសខ្លួនប៉ាឡេស្ទីននៅតំបន់កាន់កាប់វ៉េសប៊ែង បានបង្ហាញក្តីកង្វល់របស់ពួកគេចំពោះច្បាប់អ៊ីស្រាអែល ដែលបម្រាមទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ(UNRWA) ។

អ៊ីស្រាអែល បានអនុម័តច្បាប់កាលពីថ្ងៃចន្ទ ហាមឃាត់ទីភ្នាក់ងារ UNRWA ពីប្រតិបត្តិការនៅក្នុងប្រទេស គឺជាច្បាប់អាចប៉ះពាល់ដល់តំបន់ហ្កាហ្សាដែលហែកហួរដោយសារសង្រ្គាម ។

ក្រុមតំណាងរាស្រ្តដែលបានព្រាងច្បាប់ បានលើកឡើងពីការជាប់ពាក់ព័ន្ធនឹងទីភ្នាក់ងារ UNRWA នៅក្នុងការវាយប្រហារកាលពីថ្ងៃទី ៧ ខែតុលា លើតំបន់ភាគខាងត្បូងអ៊ីស្រាអែល ហើយបុគ្គលិករបស់ពួកគេ គឺជាសមាជិករបស់ក្រុមហាម៉ាស់ និងក្រុមប្រដាប់អាវុធផ្សេងទៀត ។

ជនប៉ាឡេស្ទីនមកពីជំរំជនភៀសខ្លួន Al Jalazone ស្ថិតក្នុងទីក្រុង Ramallah នៃតំបន់កាន់កាប់វ៉េសប៊ែង និយាយថា គ្រួសារពឹងផ្អែកទាំងស្រុងលើ UNRWA សម្រាប់តម្រូវការរស់នៅប្រចំារបស់ពួកគេ ។

ច្បាប់នេះដែរ បានធ្វើឲ្យមានការព្រួយបារម្ភដល់អង្គការសហប្រជាជាតិ(UN) និងសម្ព័ន្ធមិត្តលោកខាងលិចមួយចំនួនរបស់អ៊ីស្រាអែល ដែលខ្លាចថា វានឹងធ្វើឲ្យស្ថានភាពមនុស្សធម៌អាក្រក់រួចទៅហើយនៅក្នុងតំបន់ហ្កាហ្សា កាន់តែធ្ងន់ធ្ងរថែមមួយកម្រិតទៀត ជាទីដែលអ៊ីស្រាអែលកំពុងធ្វើសង្រ្គាមជាមួយក្រុមហាម៉ាស់អស់រយៈពេលជាង ១ឆ្នាំមកហើយ ។

បំរាមនេះ ពុំសំដៅលើប្រតិបត្តិការក្នុងដែនដីប៉ាឡែស្ទីន និងកន្លែងផ្សេងទៀតនោះទេ ។

ទីភ្នាក់ងារ UNRWA ដែលជាទីភ្នាក់ងារជំនួយការងារអង្គការសហប្រជាជាតិ សម្រាប់ជនភៀសខ្លួនប៉ាឡេស្ទីននោះ មានជួលកម្មកររាប់ម៉ឺននាក់ និងផ្តល់ការអប់រំ សុខភាព និងជំនួយមនុស្សធម៌ដល់ជនប៉ាឡេស្ទីនរាប់លាននាក់នៅតំបន់ហ្កាហ្សា តំបន់វ៉េសប៊ែង ហ្សកដានី លីបង់ និងប្រទេសស៊ីរី ៕