ប្រធានាធិបតីសហរដ្ឋអាមេរិក លោក Joe Biden បាននិយាយកាលពីថ្ងៃអង្គារទី២៩ ខែតុលា ថា អ៊ុយក្រែន គួរតែវាយបកវិញ ប្រសិនបើទាហានរបស់ប្រទេសកូរ៉េខាងជើង ឆ្លងចូលអ៊ុយក្រែន ដោយលោកបាននិយាយបន្ថែមថា លោកមានការព្រួយបារម្ភចំពោះវត្តមានរបស់កងទ័ពកូរ៉េខាងជើង នៅក្នុងតំបន់ Kursk ក្នុងប្រទេសរុស្ស៊ី។

លោក Biden បាននិយាយនៅពេលត្រូវបានសួរអំពីកងទ័ពកូរ៉េខាងជើង ដែលកំពុងមានវត្តមាន នៅក្នុងប្រទេសរុស្ស៊ីថា លោកមានការព្រួយបារម្ភអំពីបញ្ហានេះ ។

លោក Biden បាននិយាយនៅពេលត្រូវបានសួរថាតើ អ៊ុយក្រែនគួរតែវាយបកវិញដែរទេ នោះលោកបាននិយាយថា «ប្រសិនបើពួកគេឆ្លងចូលក្នុងប្រទេសអ៊ុយក្រែន វាគួរតែវាយបកវិញ»។

អង្គការណាតូ បាននិយាយកាលពីថ្ងៃដើមសប្តាហ៍នេះថា ទាហានកូរ៉េខាងជើងរាប់ពាន់នាក់កំពុងធ្វើដំណើរឆ្ពោះទៅកាន់សមរភូមិមុខ ជាការវិវឌ្ឍន៍មួយដែលបានជំរុញឱ្យទីក្រុងគីវ អំពាវនាវសុំអាវុធបន្ថែមទៀត និងផែនការពីអន្តរជាតិ ដើម្បីទប់ស្កាត់កងទ័ពទាំងនោះ។

មន្ទីរបញ្ចកោណ បានបញ្ជាក់កាលពីថ្ងៃអង្គារថា ទាហានកូរ៉េខាងជើងមួយចំនួនស្ថិតនៅក្នុងតំបន់ Kursk ជាតំបន់ព្រំដែនរុស្ស៊ី ជាកន្លែងដែលកងកម្លាំងអ៊ុយក្រែន បានធ្វើការវាយលុកទ្រង់ទ្រាយធំ កាលពីខែសីហា និងបានគ្រប់គ្រងទឹកដីរាប់រយគីឡូម៉ែត្រក្រឡា។

អ្នកនាំពាក្យមន្ទីរបញ្ចកោណ លោកឧត្តមសេនីយ៍ ផាទ្រីក រ៉ៃឌ័រ(Patrick Ryder) បានប្រាប់អ្នក

សារព័ត៌មានថា «យើងនៅតែមានការព្រួយបារម្ភថា រុស្ស៊ីមានបំណងប្រើប្រាស់ទាហានទាំងនោះ ក្នុងការប្រយុទ្ធ ឬគាំទ្រដល់ប្រតិបត្តិការប្រយុទ្ធប្រឆាំងកងកម្លាំងអ៊ុយក្រែននៅទីក្រុង Kursk។