បេក្ខភាពប្រធានាធិបតីបក្សប្រជាធិបតេយ្យ លោកស្រី Kamala Harris បានព្រមានមនុស្សរាប់ម៉ឺននាក់ដែលបានប្រមូលផ្តុំគ្នានៅទីក្រុងវ៉ាស៊ីនតោន ក្នុងការជួបជុំយុទ្ធនាការដ៏ធំបំផុតមិនធ្លាប់មានរបស់ខ្លួនថា បេក្ខភាពបក្សសាធារណរដ្ឋគឺលោក Donald Trump កំពុងស្វះស្វែងរកអំណាចដែលគ្មានការត្រួតពិនិត្យដ៏គ្រោះថ្នាក់ ខណៈការប្រកួតប្រជែងរបស់ភាគីទាំងពីរសម្រាប់តំណែងប្រធានាធិបតី បានឈានចូលដល់សប្តាហ៍ចុងក្រោយ។

លោកស្រី Harris បានថ្លែងបែបនេះកាលពីល្ងាចថ្ងៃអង្គារ (២៩ តុលា) នៅមុខហ្វូងមនុស្សដែលត្រូវបានប៉ាន់ប្រមាណដោយយុទ្ធនាការរបស់ខ្លួនថាមានច្រើនជាង ៧៥.០០០នាក់ នៅជិតសេតវិមានក្នុងទីតាំងថ្ងៃទី០៦ ខែមករា ឆ្នាំ២០២១ ដែលនៅពេលនោះលោក Trump បាននិយាយទៅកាន់អ្នកគាំទ្ររបស់លោក មុនពួកគេវាយប្រហារលើវិមានការពីតូល របស់សហរដ្ឋអាមេរិក។

លោក Harris បាននិយាយថា "យើងដឹងហើយថា Donald Trump ជានរណា។ លោកគឺធ្លាប់ជាប្រធានាធិបតីដែលបានបញ្ជូនក្រុមប្រដាប់អាវុធទៅកាន់វិមានកាពីតូល ដើម្បីព្យាយាមបង្វែរលទ្ធផលចាញ់ឆ្នោតរបស់ខ្លួនក្នុងការបោះឆ្នោតប្រធានាធិបតីឆ្នាំ២០២០”។

លោក Trump និងសម្ព័ន្ធមិត្តរបស់ខ្លួន តែងព្យាយាមលុបបំបាត់រូបភាពអំពើហិង្សាថ្ងៃទី០៦ មករា ក្នុងពេលដែលអ្នកគាំទ្ររបស់លោករាប់ពាន់នាក់ បានសម្រុកចូលវិមានកាពីតូល ដែលធ្វើឱ្យសមាជិកសភាត្រូវរត់ភៀសខ្លួន។ មនុស្ស ៤នាក់បានស្លាប់នៅក្នុងកុបកម្មវិមានកាពីតូល ហើយមន្ត្រីនគរបាលម្នាក់បានស្លាប់នៅថ្ងៃបន្ទាប់។

លោក Trump បាននិយាយថា ប្រសិនបើលោកជាប់ឆ្នោតឡើងវិញ លោកនឹងលើកលែងទោសដល់មនុស្សជាង ១.៥០០នាក់ ដែលត្រូវបានចោទប្រកាន់ពីបទព្រហ្មទណ្ឌជុំវិញការវាយប្រហារនោះ៕