បេក្ខជនប្រធានាធិបតីអាមេរិករបស់គណបក្សសាធារណរដ្ឋ លោក Donald Trump កាលពីថ្ងៃអង្គារ (ទី២៩ ខែតុលា) បាននិយាយថា សហភាពអឺរ៉ុប (EU) នឹងត្រូវ «ប្រឈមជាមួយផលវិបាកយ៉ាងធ្ងន់ធ្ងរ» ដែលមិនទិញទំនិញនាំចេញរបស់អាមេរិកឲ្យបានច្រើនគ្រប់គ្រាន់ ប្រសិនបើលោកឈ្នះការបោះឆ្នោតថ្ងៃទី៥ ខែវិច្ឆិកា។

អំឡុងការជួបជុំ នៅរដ្ឋប្រទាញប្រទង់ Pennsylvania បន្ទាប់ពីសន្យាអនុម័ត «ច្បាប់ពាណិជ្ជកម្មផ្ដល់ផលឲ្យគ្នាទៅវិញទៅមករបស់ Trump» លោក Trump បាននិយាយថា៖ «ខ្ញុំនឹងប្រាប់អ្នកទាំងអស់គ្នានូវអ្វីមួយ នោះគឺថា សហភាពអ៊ឺរ៉ុបស្តាប់ទៅទំនងដូចជាល្អណាស់ មានភាពទាក់ទាញណាស់ មែនទេ? ប្រទេសតូចៗដ៏ស្រស់ស្អាតទាំងឡាយ នៅអឺរ៉ុប ដែលជុំគ្នា»។

តែលោកបានបន្ថែមថា៖ «ពួកគេមិនបានទិញឡានរបស់យើងទេ។ ពួកគេមិនទិញយកផលិតផលកសិកម្មរបស់យើងទេ។ ពួកគេលក់ឡានរាប់លានគ្រឿង នៅសហរដ្ឋអាមេរិក។ មិនអាចបែបនេះបានទេ ពួកគេនឹងត្រូវប្រឈមជាមួយនឹងផលវិបាកយ៉ាងធ្ងន់ធ្ងរជាមិនខាន»។

គួរបញ្ជាក់ថា លោក Trump បានប្តេជ្ញាថា នឹងយកពន្ធ ១០ភាគរយលើការនាំចូលពីគ្រប់ប្រទេសទាំងអស់ និង ៦០ភាគរយលើការនាំចូលពីប្រទេសចិន។ ហើយសេដ្ឋវិទូព្រមានថា ចំណាត់ការទាំងនេះនឹងប៉ះពាល់ដល់ខ្សែច្រវាក់ផ្គត់ផ្គង់ នៅទូទាំងពិភពលោក ដែលទំនងជាបង្កឲ្យមានការសងសឹក និងការបង្កើនការចំណាយ។

បេក្ខជនខាងគណបក្សប្រជាធិបតេយ្យ លោកស្រី Kamala Harris បានព្រមានមនុស្សរាប់ម៉ឺននាក់ដែលបានទៅជុំគ្នា ក្នុងទីក្រុងវ៉ាស៊ីនតោន នៅឯការជួបជុំដ៏ធំបំផុតរបស់លោកស្រី កាលពីថ្ងៃអង្គារថា គូប្រជែងខាងគណបក្សសាធារណរដ្ឋ គឺលោក Trump កំពុងស្វែងរកអំណាចដែលមិនមានការទទួលខុសត្រូវ ខណៈដែលការប្រកួតប្រជែងដ៏ស្វិតស្វាញរបស់អ្នកទាំង២ ដណ្ដើមតំណែងប្រធានាធិបតី បានឈានចូលដល់សប្តាហ៍ចុងក្រោយហើយ៕